برکس ممالک دنیا کی 70 فیصد آبادی کو ٹیکہ لگانے کے ہدف پر کام کر رہا ہے: وزیر صحت

نئی دہلی// صحت و خاندانی بہبود کے مرکزی وزیر مانسکھ مانڈویہ نے منگل کے روز کہا کہ برازیل، ہندوستان، روس، چین اور جنوبی افریقہ پر مشتمل گروپ برکس کے ممالک کو مل کر دنیا کی کم از کم 70 فیصد آبادی کو ٹیکہ لگانے کی مہم شروع کرنی چاہیے۔
ویڈیو کانفرنسنگ کے ذریعے یہاں برکس ویکسین ریسرچ اینڈ ڈیولپمنٹ سینٹر کا افتتاح کرتے ہوئے مسٹر مانڈویہ نے کہا کہ عالمی ادارہ صحت نے کورونا وائرس کی عالمی وبا سے نمٹنے کے لیے 2022 کے وسط تک دنیا کی کم از کم 70 فیصد آبادی کو ویکسین فراہم کرنے کا ہدف مقرر کیا ہے۔ برکس ممالک کو اس سمت میں مل کر کام کرنا چاہیے۔
انہوں نے کہا کہ یہ مرکز عالمی ادارہ صحت کے ہدف کے تئیں عزم ظاہر کرنے کا اشارہ ہے۔ اس مرکز کے قیام سے کووڈ کے ٹیکے کی منصفانہ اور محفوظ تقسیم میں مدد ملے گی۔ انہوں نے کہا کہ ہندوستان برکس سمیت تمام ممالک کے ساتھ ویکسین مینوفیکچرنگ انڈسٹری کے قیام میں تعاون کرنے کے لئے تیار ہے۔
وزیر موصوف نے کہا کہ ہندوستان 150 سے زیادہ ممالک کو ویکسین فراہم کر رہا ہے اور ہندوستان عالمی ادارہ صحت کی ویکسین کی 65 سے 70 فیصد ضرورت پوری کررہا ہے۔