درجہ حرارت میں نمایاں کمی ‘۱۷؍اکتوبر سے موسم خشک رہنے کا امکان ‘سرینگر کے کچھ رہائشی علاقوں میں بجلی سپلائی میں خلل
سرینگر؍۱۴؍اکتوبر
حکام کے مطابق، ایک فعال مغربی ہوائی نظام کے زیر اثر رات بھر تازہ برف باری ہونے کے بعد بدھ کی صبح کشمیر کے بالائی علاقوں کے کئی مقامات سفید چادر میں ڈھک گئے۔
حکام نے بتایا کہ وادی کے میدانی علاقوں میں رات بھر بارش ہوتی رہی۔
محکمہ موسمیات نے آئندہ۲۴گھنٹوں کے دوران موسم خراب رہنے کی پیش گوئی کی ہے۔حکام کے مطابق، فعال مغربی ہوائی نظام کے زیر اثر بالائی علاقوں کے کئی مقامات پر رات کے دوران ہلکی سے درمیانی درجے کی برف باری ہوئی۔
کشمیر کے بالائی علاقوں کے متعدد مقامات پر تازہ برف باری ہوئی، جبکہ کئی دیگر مقامات پر مسلسل دوسرے روز بھی برف باری جاری رہی۔
جنوبی کشمیر کے ضلع اننت ناگ میں واقع سیاحتی مقام پہلگام اور اس کے ملحقہ علاقوں میں بھی رات کے دوران تازہ برف باری ہوئی۔
سیاحتی مقامات گلمرگ اور سونہ مرگ کے علاوہ زوجیلا محور، شمالی کشمیر کے گریز علاقے میں رازدان ٹاپ اور تولیل میں بھی وقفے وقفے سے برف باری جاری رہی۔
وادی کے میدانی علاقوں، بشمول گرمائی دارالحکومت سرینگر، میں رات بھر بارش ہوتی رہی، تاہم صبح کے وقت بادل چھٹ گئے اور دھوپ نکل آئی۔
محکمہ موسمیات کے مطابق، جمعرات تک کئی مقامات پر ہلکی سے درمیانی درجے کی بارش اور بالائی علاقوں میں ہلکی برف باری کا امکان ہے۔ اس دوران گرج چمک، تیز ہوائیں چلنے اور بعض مقامات پر ژالہ باری بھی ہو سکتی ہے۔
محکمہ موسمیات نے کہا کہ۱۶؍ اکتوبر کو موسم عمومی طور پر خشک رہے گا، تاہم بعض مقامات پر مختصر وقت کے لیے ہلکی بارش ہو سکتی ہے۔ اس کے بعد۱۷ سے ۲۴؍اکتوبر تک موسم عمومی طور پر خشک رہنے کا امکان ہے۔۱۷سے۲۴؍ اکتوبر تک موسم خشک رہنے کی توقع ہے۔
۲۵ سے۲۷اکتوبر کے دوران موسم ایک بار پھر ابر آلود رہنے کا امکان ہے۔ اس دوران چند مقامات پر ہلکی بارش اور بالائی علاقوں میں ہلکی برف باری ہو سکتی ہے۔ بعض مقامات پر گرج چمک کے ساتھ طوفانی ہوائیں چلنے کا بھی امکان ہے۔
مسافروں، ٹرانسپورٹروں اور عام لوگوں کو مشورہ دیا گیا ہے کہ وہ اپنے سفر کی منصوبہ بندی موسم کی صورت حال کو مدنظر رکھتے ہوئے کریں اور ٹریفک سے متعلق تازہ ہدایات پر عمل کریں۔ خاص طور پر پہاڑی درّوں اور سڑکوں پر گرج چمک، تیز ہواؤں اور برف باری کے امکان کے پیش نظر احتیاط برتنے کی تاکید کی گئی ہے۔
اکتوبر کے آغاز میں نسبتاً گرم موسم کے بعد اب موسم میں تبدیلی آئی ہے اور کشمیر، چناب وادی اور پیر پنجال خطے میں دن کے درجۂ حرارت میں کمی درج کی جا رہی ہے۔ابر آلود موسم اور بڑھتی ہوئی سردی کے پیش نظر لوگوں نے گرم کپڑے نکالنا شروع کر دیے ہیں۔
محکمہ موسمیات کے ایک افسر نے بتایا کہ بارش کے دوران کم سے کم درجۂ حرارت موجودہ سطح کے آس پاس رہنے کا امکان ہے، جبکہ زیادہ سے زیادہ درجۂ حرارت میں مزید ایک سے دو ڈگری سیلسیئس کی کمی ہو سکتی ہے۔افسر کے مطابق۱۵؍ اکتوبر کے بعد موسم زیادہ تر خشک رہنے کی توقع ہے۔
محکمہ موسمیات نے کسانوں کو بارش کے دوران زرعی سرگرمیاں انجام دیتے وقت احتیاط برتنے کا مشورہ دیا ہے، بالخصوص دھان کی کٹائی کے معاملے میں۔
افسر نے کہا، ’’کسانوں کو چاہیے کہ ان تین دنوں کے دوران جاری کٹائی کے کام میں کچھ احتیاط برتیں۔ اس کے بعد وہ معمول کے مطابق اپنا کام دوبارہ شروع کر سکتے ہیں۔‘‘
محکمہ نے بتایا کہ پیش گوئی میں ایسے موسمی حالات کا کوئی اشارہ نہیں ملا ہے جن سے سڑکوں پر بڑے پیمانے پر آمدورفت متاثر ہونے یا تودے کھسکنے کا خدشہ ہو۔
۔۔۔۔۔۔۔۔
(ندائے مشرق خبر)
