آسٹریلیا دورے کے لیے آرچر اور بیتھل کی انگلینڈ کی ون ڈے ٹیم میں واپسی

ندن، 13 اکتوبر (یواین آئی) جوفرا آرچر اور جیکب بیتھل نومبر میں آسٹریلیا کے دورے کے لیے انگلینڈ کی ون ڈے ٹیم میں واپس آگئے ہیں۔ آرچر کو پاکستان میں ہونے والی آئندہ سہ فریقی سیریز کے لیے آرام دیا گیا تھا اور وہ جولائی میں ہندوستان کے خلاف ون ڈے سیریز کے دوران گھٹنے میں لگی چوٹ سے صحت یاب ہوگئے ہیں۔ ہیری بروک کی قیادت والی 16 رکنی ون ڈے ٹیم اگلے سال ہونے والے عالمی کپ کی تیاری کے لیے پوری قوت کے ساتھ میدان میں اترے گی۔ حالیہ ہیمسٹرنگ سرجری کے بعد جوز بٹلر دستیاب نہیں ہیں، جبکہ ساکب محمود گھٹنے کی چوٹ کے باعث ٹیم سے باہر ہیں۔
تاہم آرچر، گس اٹکنسن، سنی بیکر اور جوش ٹنگ اس کے بعد ہونے والی ٹی-20 سیریز کا حصہ نہیں ہوں گے، کیونکہ انگلینڈ جنوبی افریقہ کے ٹیسٹ دورے سے قبل اپنے تیز گیندبازوں کو مناسب آرام دینے اور ان کی فٹنس کا خیال رکھنے کی پالیسی پر عمل کررہا ہے۔
انگلینڈ کے قومی سلیکٹر مارکس نارتھ نے کہا، "ون ڈے سیریز کے لیے جیکب بیتھل اور جوفرا آرچر کی واپسی کا مطلب ہے کہ ہم تقریباً اپنی مکمل طاقت کے ساتھ میدان میں ہوں گے اور ایک سال بعد ہونے والے عالمی کپ کی تیاری تیز کریں گے۔ تین میچوں کی ون ڈے سیریز کے بعد چار تیز گیندباز ٹیم سے الگ ہوجائیں گے، کیونکہ ہم جنوبی افریقہ کے ٹیسٹ دورے سے قبل انہیں مناسب طریقے سے مینیج کرنا چاہتے ہیں۔”
انگلینڈ کی ون ڈے ٹیم: ہیری بروک (کپتان)، جوفرا آرچر، گس اٹکنسن، سنی بیکر، ٹام بینٹن، جیکب بیتھل، جارڈن کاکس، ہنری کِروکومب، سیم کرن، لیام ڈاسن، بین ڈکٹ، ول جیکس، جیمی اوورٹن، عادل رشید، جو روٹ، جوش ٹنگ۔
دوسری جانب ٹی-20 ٹیم میں چار ایسے کھلاڑی شامل کیے گئے ہیں جنہوں نے ابھی انگلینڈ کی جانب سے بین الاقوامی کرکٹ نہیں کھیلی ہے۔ ان میں تھامس ریو اور ایڈی جیک بھی شامل ہیں، جنہیں پہلی مرتبہ انگلینڈ کی ٹیم میں جگہ ملی ہے۔ 18 سالہ ریو ٹیم کے سب سے کم عمر کھلاڑی ہیں اور انہیں ایک روز قبل ہی ای سی بی کا مرکزی معاہدہ ملا ہے۔ انہوں نے فروری میں آئی سی سی مینز انڈر-19 عالمی کپ کے فائنل میں انگلینڈ کی قیادت کی تھی۔ ریو اور جیک دونوں گزشتہ سال آسٹریلیا کا دورہ کرنے والی انگلینڈ لائنز ٹیم کا حصہ تھے۔
اس دوران فل سالٹ بھی کواڈریسیپس کی چوٹ سے صحت یاب ہونے کے بعد ٹیم میں واپس آئے ہیں، جس کے باعث وہ گزشتہ ماہ سری لنکا کے خلاف انگلینڈ کی 3-0 سے ٹی-20 سیریز میں حصہ نہیں لے سکے تھے۔ اسی سیریز میں ڈیبیو کرنے والے اینیورین ڈونالڈ نے اپنی جگہ برقرار رکھی ہے، جبکہ لیوک ووڈ کو بھی دوبارہ ٹیم میں شامل کیا گیا ہے۔
نارتھ نے کہا، "ہماری ٹی-20 ٹیم کپتان ہیری بروک کی قیادت میں شاندار فارم میں ہے اور ہم ایک مضبوط ٹیم کے خلاف آسٹریلوی حالات میں خود کو آزمانے کے موقع کے منتظر ہیں۔”