شکھر دھون ایشیا واریئرز میں پاکستانی کھلاڑی افتخار اور تنویر کے ساتھ نظر آئیں گے

دبئی، 13 اکتوبر (یواین آئی) ہندوستان کے سابق اوپنر شکھر دھون دسمبر 2026 میں ہانگ کانگ میں ہونے والے افتتاحی ورلڈ ٹی-20 کانٹی نینٹ کپ میں ایشیا واریئرز کی ٹیم کا حصہ ہوں گے، جہاں وہ پاکستان کے افتخار احمد اور سہیل تنویر کے ساتھ ڈریسنگ روم شیئر کریں گے۔
رپورٹ کے مطابق اس ٹورنامنٹ میں چار براعظموں کی نمائندگی کرنے والی سابق بین الاقوامی کرکٹ ٹیمیں حصہ لیں گی۔ ایشیا واریئرز کا مقابلہ افریقہ لائنز، یورپ چیمپئنز اور نارتھ امریکہ ایگلز سے ہوگا۔ منتظمین کے مطابق ٹی-20 فارمیٹ میں کھیلے جانے والے اس مقابلے میں بین الاقوامی کرکٹ کے کئی معروف سابق کھلاڑی اپنی صلاحیتوں کا مظاہرہ کریں گے۔
ٹورنامنٹ کے لیے نو میچوں کا اعلان کیا گیا ہے، جن میں فائنل بھی شامل ہے، جبکہ چاروں ٹیموں میں 60 سے زائد ریٹائرڈ بین الاقوامی کھلاڑیوں کے شرکت کرنے کی توقع ہے۔ ایشیا واریئرز کے 24 رکنی اسکواڈ میں دھون کے علاوہ ہندوستان کے اسپنر راہل شرما، بنگلہ دیش کے تجربہ کار کھلاڑی روبیل حسین اور محمود اللہ ریاض بھی شامل ہیں۔
دھون محدود اوورز کی کرکٹ میں ہندوستان کے کامیاب بلے بازوں میں شمار ہوتے ہیں۔ وہ 2013 کی چیمپئنز ٹرافی اور 2015 کے ورلڈ کپ میں ہندوستانی ٹیم کا حصہ رہے تھے۔ وہ اپنی جارحانہ بلے بازی کے لیے بھی معروف ہیں۔
ایشیا واریئرز میں پاکستان کے آل راؤنڈر افتخار احمد اور بائیں ہاتھ کے فاسٹ بولر سہیل تنویر بھی شامل ہیں۔ تنویر 2009 کا ٹی-20 ورلڈ کپ جیتنے والی پاکستانی ٹیم کا حصہ تھے اور دنیا بھر کی کئی فرنچائز لیگز میں کھیل چکے ہیں۔
منتظمین نے ابھی ٹورنامنٹ کا مکمل شیڈول جاری نہیں کیا ہے اور دسمبر میں ہونے والے اس مقابلے سے قبل مزید تفصیلات سامنے آنے کی توقع ہے۔ ورلڈ ٹی-20 کانٹی نینٹ کپ ہانگ کانگ میں کھیلا جائے گا۔