جموں؍۱۳؍اکتوبر
جموں کشمیر کے ضلع پونچھ کے سرنکوٹ علاقے میں منگل کو ایک قدرتی غار کے اندر جنگجوؤں کی ممکنہ کمین گاہ کا پردہ فاش کیا گیا، جہاں سے ایک خودکار رائفل، چھ دستی بم اور گولہ بارود برآمد کیا گیا۔ حکام نے یہ اطلاع دی۔
حکام کے مطابق، علاقے میں مشتبہ نقل و حرکت کی اطلاعات ملنے کے بعد فوج اور پولیس نے ستھربن جنگلات میں مشترکہ تلاشی کارروائی انجام دی، جس کے دوران اسلحے کا ذخیرہ برآمد ہوا۔
برآمد شدہ اشیا میں ایک اے کے۴۷ رائفل، ایک میگزین‘۳۰ کارتوس، چھ دستی بم اور کچھ طبی سامان شامل ہے۔ کارروائی کے دوران کسی کو گرفتار نہیں کیا گیا۔
دریں اثنا، حکام نے بتایا کہ ضلع ادھم پور کے مجالتہ اور ضلع کٹھوعہ کے بلاور کے بالائی علاقوں میں مشتبہ نقل و حرکت کی اطلاعات کے بعد تلاشی کارروائی جاری ہے۔
فوج، بشمول پیرا کمانڈوز، اور پولیس پر مشتمل مشترکہ ٹیم پیر کی شام سے جنگلاتی علاقوں میں کارروائی کر رہی ہے۔ ادھم پور کے مجالتہ علاقے میں سوان، کھوبن، چورے اور ناگن، جبکہ کٹھوعہ میں صدرؤتہ، بھیڑ اور بلور کے علاقوں میں تلاشی لی جا رہی ہے۔
حکام کے مطابق، تاحال مشتبہ افراد کے ساتھ کوئی رابطہ قائم نہیں ہو سکا ہے۔
ایک الگ واقعے میں، فوجی اہلکاروں نے منگل کی صبح پونچھ کے مینڈھر سیکٹر میں بسونی علاقے کے نزدیک سرحدی باڑ کے قریب دو زنگ آلود بارودی سرنگوں کا پتہ لگایا۔
حکام نے بتایا کہ جاری راستہ تعمیراتی کام کے دوران ان بارودی سرنگوں کا سراغ ملا، جس کے بعد فوجی ماہرین نے انہیں قابو میں کیے گئے دھماکے کے ذریعے تباہ کر دیا۔
گزشتہ ایک ہفتے کے دوران اس علاقے میں ایک درجن سے زائد بارودی سرنگوں کا پتہ لگا کر انہیں ناکارہ بنایا جا چکا ہے۔
۔۔۔۔۔۔۔۔(ایجنسیاں)
