چین آئچی ناگویا ایشین پیرا گیمز میں 312 ایتھلیٹس بھیجے گا

بیجنگ، 10 اکتوبر (یواین آئی) چین نے ہفتہ کو آئچی ناگویا ایشین پیرا گیمز کے لیے 500 رکنی دستے کا اعلان کیا، جس میں 312 ایتھلیٹس شامل ہیں۔ یہ کھلاڑی 17 کھیلوں کے 335 مقابلوں میں حصہ لیں گے۔ کسی بیرون ملک منعقد ہونے والے ایشین گیمز کے لیے یہ چین کا اب تک کا سب سے بڑا ایتھلیٹ دستہ ہے۔
ایتھلیٹس کی اوسط عمر 28.8 سال ہے، جبکہ ان کی عمریں 16 سے 50 سال کے درمیان ہیں۔ دستے میں 146 مرد اور 166 خواتین ایتھلیٹس شامل ہیں۔ یہ تمام شوقیہ کھلاڑی ہیں اور ان میں کارکن، طلبہ اور فری لانسرز شامل ہیں۔
چین کی پیرا تیراک جیانگ یویان نے کہا کہ وہ آئچی ناگویا میں چھ مقابلوں میں حصہ لیں گی اور اچھی فارم میں ہیں۔ جیانگ نے ہانگژو ایشین پیرا گیمز میں سات طلائی اور پیرس 2024 پیرا اولمپک گیمز میں بھی سات طلائی تمغے جیتے تھے۔ 2025 میں انہیں ‘لارئس اسپورٹس پرسن آف دی ایئر ود اے ڈس ایبلٹی منتخب کیا گیا تھا۔
انہوں نے کہا کہ انہیں امید ہے کہ وہ اپنے مضبوط مقابلوں میں سرفہرست رہیں گی اور دیگر مقابلوں میں اپنی بہترین کارکردگی پیش کرنے کی کوشش کریں گی۔
آئچی ناگویا ایشین پیرا گیمز 18 سے 24 اکتوبر تک منعقد ہوں گے۔ ان میں 18 کھیلوں کے 500 سے زائد مقابلے ہوں گے، جن میں پیرا سوئمنگ، وہیل چیئر باسکٹ بال اور سٹنگ والی بال شامل ہیں۔ گیمز میں 45 ممالک اور خطوں کے 3,000 سے زائد ایتھلیٹس کی شرکت متوقع ہے۔
ایشین پیرا گیمز میں چین کی یہ پانچویں شرکت ہوگی۔