سرینگر؍۸؍ اکتوبر
کشمیر کے بیشتر علاقوں میں جمعرات کو موسلادھار بارش کے ساتھ ژالہ باری ہوئی، جبکہ محکمہ موسمیات نے آئندہ۴۸ گھنٹوں کے دوران موسم میں خرابی اور بالائی علاقوں میں ہلکی برفباری کی پیش گوئی کی ہے۔
حکام کے مطابق جمعرات کی شام سرینگر سمیت کشمیر کے کئی علاقوں میں شدید بارش ہوئی۔ متعدد علاقوں میں ژالہ باری، تیز ہواؤں اور گرج چمک کے ساتھ بارش ہوئی، جس کے نتیجے میں بعض مقامات پر سڑکوں اور نشیبی علاقوں میں پانی جمع ہوگیا۔
محکمہ موسمیات کے مطابق۱۰؍ اکتوبر تک کشمیر کے بعض علاقوں میں بارش جبکہ بالائی علاقوں میں ہلکی برفباری کا امکان ہے۔۹؍اکتوبر کی شام اور۱۱ سے۱۳؍ اکتوبر کے دوران بھی بعض مقامات پر مختصر دورانیے کی ہلکی بارش ہوسکتی ہے۔
محکمہ موسمیات کے ایک ترجمان نے بتایا کہ جمعرات کی رات سے جموں و کشمیر کے۷۰ سے۸۰فیصد علاقوں میں ہلکی سے درمیانی بارش کا وسیع سلسلہ متوقع ہے، جبکہ بالائی علاقوں میں برفباری ہوسکتی ہے۔
محکمہ کے مطابق۱۱؍اکتوبر سے موسم میں بہتری آنا شروع ہوگی اور۱۳ ؍اکتوبر کی شام تک موسم عمومی طور پر خشک رہنے کا امکان ہے۔ تاہم۱۴؍اور۱۵؍اکتوبر کو ایک مرتبہ پھر بارش کا سلسلہ شروع ہوسکتا ہے۔ اس دوران میدانی علاقوں میں ہلکی بارش اور بالائی علاقوں میں ہلکی برفباری کے ساتھ بعض مقامات پر گرج چمک اور تیز ہوائیں چلنے کا امکان ہے۔
۱۶ ؍اکتوبر سے موسم دوبارہ خشک ہونے اور۱۸اکتوبر تک یہی صورتحال برقرار رہنے کی پیش گوئی کی گئی ہے۔
دریں اثنا، تیز ہواؤں اور بارش کے دوران ڈل جھیل میں شکارا پھنس جانے کے بعد تقریباً۱۵سیاحوں کو بحفاظت نکال لیا گیا۔
حکام کے مطابق سیاح ڈل جھیل میں شکارا کی سیر کر رہے تھے کہ نیہرو پارک کے قریب تیز ہواؤں اور بارش کے باعث ان کا شکارا پھنس گیا۔ اطلاع ملنے پر سی آر پی ایف اور ایس ڈی آر ایف کے اہلکاروں اور امدادی ٹیموں نے فوری کارروائی کرتے ہوئے تمام سیاحوں کو بحفاظت نکال لیا۔
ایک عہدیدار نے بتایا کہ ریسکیو کے وقت سیاحوں کی درست تعداد شمار نہیں کی جاسکی، اس لیے یہ تعداد۱۵ سے زیادہ بھی ہوسکتی ہے۔
حکام کے مطابق تمام سیاح محفوظ ہیں، جبکہ واقعے کی تحقیقات شروع کردی گئی ہے۔
۔۔۔۔۔۔۔۔ (ایجنسیاں)
