پہلی ٹی-20 سنچری کے بعد شریئس ایّر کی کیریئر کی بہترین ساتویں رینکنگ

دبئی، 7 اکتوبر (یواین آئی) ہندوستانی کپتان شریئس ایّر ویسٹ انڈیز کے خلاف پہلے ٹی-20 میچ میں اپنی پہلی سنچری بنانے کے بعد مردوں کی ٹی-20 بلے بازی کی عالمی رینکنگ میں کیریئر کی بہترین ساتویں پوزیشن پر پہنچ گئے ہیں۔
ایّر نے 43 گیندوں میں 10 چوکوں اور چھ چھکوں کی مدد سے ناٹ آؤٹ 102 رن بنائے، جس کی بدولت عالمی چیمپئن ہندوستان نے 32 گیندیں باقی رہتے آٹھ وکٹ سے شاندار کامیابی حاصل کی۔ اس دھماکہ خیز اننگز سے ایّر نے رینکنگ میں 18 درجے کی چھلانگ لگائی اور وہ اس فارمیٹ میں ہندوستان کے تیسرے سب سے اعلیٰ رینک والے بلے باز بن گئے ہیں۔ ایشان کشن پہلے، ابھیشیک شرما دوسرے اور تلک ورما 10ویں نمبر پر ہیں۔
ویسٹ انڈیز کے بلے باز شیرفین ردرفورڈ 56 رن کی تیز اننگز کے بعد 10 درجے ترقی کرکے 37ویں نمبر پر پہنچ گئے۔ ہندوستان کے نوجوان ویشو سوریہ ونشی آٹھ درجے اوپر 46ویں اور پاکستان کے حسن نواز 62 درجے کی بڑی چھلانگ کے ساتھ 48ویں نمبر پر پہنچ گئے ہیں۔
گیندبازوں کی رینکنگ میں افغانستان کے راشد خان دوبارہ پہلے نمبر پر پہنچ گئے ہیں۔ ہندوستان کے لیفٹ آرم اسپنر اکشر پٹیل گزشتہ ہفتے تین میچوں میں دو دو وکٹ لینے کے بعد 16 درجے ترقی کرکے ساتویں نمبر پر آگئے ہیں۔ بنگلہ دیش کے نسیم احمد اور مہدی حسن بھی بالترتیب آٹھویں اور نویں نمبر پر پہنچ گئے ہیں۔
مردوں کی ون ڈے بلے بازی رینکنگ میں ہندوستانی کپتان شبھمن گل نے گواہاٹی میں ویسٹ انڈیز کے خلاف دوسرے ون ڈے میں ناٹ آؤٹ 223 رن کی اننگز کے بعد اپنی پہلی پوزیشن مزید مضبوط کرلی ہے۔ یہ فارمیٹ میں ان کی دوسری ڈبل سنچری اور ون ڈے رن چیز میں سب سے بڑا اسکور ہے۔ اس کے ساتھ انہوں نے 25 ریٹنگ پوائنٹس حاصل کرکے کیریئر کے بہترین 841 پوائنٹس کی برابری کرلی۔ سابق کپتان وراٹ کوہلی دوسرے سے تیسرے نمبر پر چلے گئے ہیں۔