سرینگر/29 جولائی
وادی کشمیر کو ملک کے باقی حصوں کے ساتھ جوڑنے والی270 کلو میٹر طویل سرینگر، جموں قومی شاہراہ جمعے کو دوسرے روز بھی مسلسل بند ہے ۔
تاہم جنوبی کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والے تاریخی مغل روڈ پر ٹریفک کی نقل و حمل جاری ہے ۔
ٹریفک پولیس کے ایک عہدیدار کے مطابق سری نگر- جموں قومی شاہراہ پر پانتھیال کے مقام پرچٹانیں کھسک آنے کی وجہ سے ٹریفک کی نقل و حمل مسلسل بند ہے ۔
پولیس نے کہا کہ مسلسل بارشوں کی وجہ سے شاہراہ کو بحال کرنے کے لئے آپریشن شروع کرنے میں دقتیں پیش آ رہی ہیں۔ان کا کہنا تھا’قومی شاہراہ پر آج بھی ٹریفک کو چلنے کی اجازت نہیں ہے اور موسم میں بہتری کے ساتھ ہی بحالی کا آپریشن شروع کیا جائے گا‘۔
ادھر جنوبی کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والے تاریخی مغل روڈ پر ٹریفک کی نقل و حمل جاری ہے ۔
سرکاری ذرائع نے بتایا کہ مغل روڈ پر گذشتہ شام مٹی کے تودے گر آنے کی وجہ سے کچھ وقت کے لئے ٹریفک کی نقل و حمل متاثر رہی تھی لیکن اس کو بعد میں بحال کر دیا گیا۔
قابل ذکر ہے کہ اہلیان وادی کے لئے شہہ رگ کی حیثیت رکھنے والی سرینگر، جموں قومی شاہراہ کے بند ہونے سے لوگوں کو گوناگوں مشکلات کا سامنا کرنا پڑتا ہے ۔
لوگوں کا کہنا ہے کہ شاہراہ کے بند ہونے سے جہاں ایک طرف بازاروں میں اشیائے ضروریہ کی قلت پیدا ہوجاتی ہے وہیں دوسری طرف گراں بازاری بھی آسمان چھونے لگتی ہے ۔
