گھریلو سیزن سے قبل آشوتوش شرما نے ٹیم تبدیل کرلی

نئی دہلی، 6 اکتوبر (یواین آئی) آئی پی ایل میں دہلی کیپٹلز کے فنشر آشوتوش شرما نے 2026-27 کے گھریلو سیزن سے قبل ریلوے کا ساتھ چھوڑ کر گجرات کی ٹیم میں شمولیت اختیار کرلی ہے۔ امکان ہے کہ آشوتوش گجرات کے لیے محدود اوورز کی کرکٹ میں بھی حصہ لیں گے۔
آشوتوش ان تین پیشہ ور کھلاڑیوں میں شامل ہیں جنہیں گجرات نے اپنی ٹیم میں شامل کیا ہے۔ دیگر دو کھلاڑی راجستھان کے تیز گیندباز اشوک شرما، جو فی الحال زخمی ہیں، اور لیگ اسپنر روی بشنوئی ہیں۔
مدھیہ پردیش سے تعلق رکھنے والے آشوتوش نے اپنے لسٹ اے اور ٹی-20 کریئر کا آغاز ریاستی ٹیم سے کیا تھا۔ وہ اس سے قبل اپنے آبائی صوبے میں مناسب مواقع نہ ملنے کی وجہ سے ٹیم تبدیل کرنے کی ضرورت پر کھل کر بات بھی کرچکے ہیں۔
آشوتوش کی گجرات میں شمولیت ایسے وقت ہوئی ہے جب مونٹی دیسائی نے ٹیم کے ہیڈ کوچ کی ذمہ داری سنبھالی ہے۔ نیپال اور حال ہی میں کینیڈا کے ساتھ کام کرچکے دیسائی نے اس عہدے پر رمیش پوار کی جگہ لی ہے۔ ہندوستان کے سابق آف اسپنر پوار نے مردوں کی جونیئر سلیکشن کمیٹی میں ایک عہدے کے لیے درخواست دی ہے۔ حال ہی میں وہ ہندوستان کے دورے پر آئی آسٹریلیا کی انڈر 19 ٹیم کے اسپن مشیر بھی رہے تھے۔
آشوتوش حال ہی میں انگلینڈ میں ہیمپشائر کے لیے ون ڈے کپ کھیل کر واپس آئے ہیں، تاہم وہاں اپنی گزشتہ سات اننگز میں ان کا سب سے زیادہ اسکور صرف 16 رن رہا۔ اس معاہدے کو جی ایم آر گروپ نے ممکن بنایا ہے، جو دہلی کیپٹلز کا شریک مالک اور ہیمپشائر کاؤنٹی کرکٹ ٹیم کا مالک بھی ہے۔