رام بن/جموں؍۳ اکتوبر
ہفتہ کے روز ضلع رام بن میں جموں۔سری نگر قومی شاہراہ پر آدھے گھنٹے کے اندر پیش آئے دو الگ الگ سڑک حادثات میں مغربی بنگال سے تعلق رکھنے والی ایک سیاح خاتون ہلاک جبکہ۵۶؍افراد، جن میں۹سکیورٹی اہلکار بھی شامل ہیں، زخمی ہوگئے۔ حکام نے یہ اطلاع دی۔
حکام کے مطابق دونوں حادثات میں ایک سیاحوں سے بھری مسافر بس اور امدادی کارروائی میں مدد کے لیے جائے حادثہ کی طرف روانہ ہونے والی سکیورٹی گاڑی شامل تھی۔
لیفٹیننٹ گورنر منوج سنہا نے جانی نقصان پر گہرے دکھ کا اظہار کرتے ہوئے زخمیوں کی جلد صحت یابی کے لیے دعا کی۔
حکام نے بتایا کہ مغربی بنگال کے رجسٹریشن نمبر والی مسافر بس سری نگر سے جموں کی طرف جارہی تھی کہ صبح تقریباً ۸بج کر۵۰منٹ پر شاہراہ پر ماروگ کے قریب ڈرائیور کے گاڑی پر قابو کھو دینے کے بعد پہاڑی سے جا ٹکرائی۔ حادثے میں ایک خاتون مسافر ہلاک جبکہ 47 دیگر زخمی ہوگئے۔
ہلاک ہونے والی خاتون کی شناخت جمونا، ساکن مغربی بنگال کے طور پر ہوئی ہے۔ مسافروں کا یہ گروپ کشمیر میں تعطیلات گزارنے کے بعد واپس جارہا تھا۔
حکام کے مطابق زخمیوں میں سے چار، سچترا، لکشونتی، کیدار پاترا اور فوجی رام کو مزید علاج کے لیے گورنمنٹ میڈیکل کالج اسپتال جموں منتقل کیا گیا۔ باقی زخمیوں کی حالت مستحکم بتائی گئی ہے اور انہیں اگلے چند گھنٹوں کے دوران اسپتال سے فارغ کیے جانے کی توقع ہے۔
حادثے کی اطلاع ملنے کے بعد رام بن کے ضلعی پولیس لائنز سے پولیس اور سی آر پی ایف پر مشتمل فوری ردعمل ٹیم (کیو آر ٹی) کو امدادی کارروائی میں مدد کے لیے روانہ کیا گیا۔
تاہم، کیلا موڑ کے قریب امدادی ٹیم کی گاڑی بھی حادثے کا شکار ہوکر الٹ گئی، جس کے نتیجے میں 6 پولیس اہلکار اور 3 سی آر پی ایف اہلکار زخمی ہوگئے۔ حکام کے مطابق تمام زخمی سکیورٹی اہلکاروں کی حالت مستحکم ہے۔
لیفٹیننٹ گورنر منوج سنہا نے جانی نقصان پر افسوس کا اظہار کرتے ہوئے شدید زخمی افراد کو بہترین ممکنہ طبی سہولیات فراہم کرنے کی یقین دہانی کرائی۔
سنہا نے سماجی رابطے کی ویب سائٹ ’ایکس‘ پر ایک پوسٹ میں کہا کہ رام بن میں پیش آئے المناک بس حادثے میں ایک شخص کی موت پر انہیں گہرا صدمہ پہنچا ہے۔ انہوں نے سوگوار خاندان سے تعزیت کا اظہار کیا اور بتایا کہ انہوں نے رام بن کے ڈپٹی کمشنر سے بات کرکے جموں کے جی ایم سی منتقل کیے گئے شدید زخمیوں کو بہترین ممکنہ علاج فراہم کرنے کو یقینی بنانے کی ہدایت کی ہے۔ انہوں نے زخمیوں کی جلد صحت یابی کے لیے دعا بھی کی۔
مرکزی وزیر جتیندر سنگھ نے بھی بتایا کہ انہوں نے سری نگر سے جموں جانے والی مسافر بس کے حادثے کی اطلاع ملنے کے بعد رام بن کے ڈپٹی کمشنر محمد الیاس خان سے بات کی۔
(ایجنسیاں ) انہوں نے کہا کہ زخمیوں کو ہر ممکن مدد اور طبی سہولیات فراہم کی جارہی ہیں اور ان کا دفتر متعلقہ حکام کے ساتھ مسلسل رابطے میں ہے۔
