بارہمولہ؍۳؍اکتوبر
بارہمولہ پولیس نے آن لائن مالی فراڈ کے ایک معاملے میں متاثرہ شخص سے مبینہ طور پر دھوکہ دہی کے ذریعے ہتھیائی گئی۱۱لاکھ۷۰ہزارلاکھ روپے کی رقم میں سے۶لاکھ۷۰ لاکھ روپے برآمد کر لیے ہیں، حکام نے ہفتہ کو بتایا۔
یہ معاملہ سائبر پولیس اسٹیشن بارہمولہ میں درج ایک ایف آئی آرکے تحت انفارمیشن ٹیکنالوجی ایکٹ اور بھارتیہ نیائے سنہتا کی متعلقہ دفعات کے تحت درج کیا گیا ہے۔
پولیس نے بتایا کہ رقم کی برآمدگی مسلسل تحقیقات، تکنیکی تجزیے، مالی لین دین کی نگرانی اور متعلقہ بینکنگ حکام کے ساتھ تال میل کے ذریعے عمل میں لائی گئی۔ برآمد شدہ رقم بعد ازاں متاثرہ شخص کو واپس کر دی گئی۔
تحقیقات ڈپٹی سپرنٹنڈنٹ آف پولیس ہیڈکوارٹرز شہاجہان چودھری کی نگرانی میں کی گئی، جبکہ سائبر پولیس اسٹیشن بارہمولہ کے ایس ایچ او انسپکٹر سجاد وانی نے اپنی تفتیشی ٹیم کے ہمراہ تحقیقات کی قیادت کی۔
پولیس نے بتایا کہ معاملے کی مزید تحقیقات جاری ہے۔
بارہمولہ پولیس نے شہریوں کو آن لائن مالی فراڈ کے خلاف محتاط رہنے اور او ٹی پی، پن، سی وی وی، پاس ورڈ، یو پی آئی پن یا دیگر بینکنگ معلومات کسی کے ساتھ شیئر نہ کرنے کا مشورہ دیا ہے۔
شہریوں سے مشتبہ لنکس، غیر مصدقہ ایپلی کیشنز اور نامعلوم کیو آر کوڈز سے بھی گریز کرنے کی اپیل کی گئی ہے۔
کسی غیر مجاز لین دین یا سائبر فراڈ کا شبہ ہونے کی صورت میں پولیس نے شہریوں سے فوری طور پر۱۹۳۰پر رابطہ کرنے، قومی سائبر جرائم رپورٹنگ پورٹل کے ذریعے شکایت درج کرنے اور بلا تاخیر اپنے بینک کو مطلع کرنے کی اپیل کی ہے۔
پولیس نے مزید کہا کہ متاثرین لین دین کی تفصیلات، اسکرین شاٹس، فون نمبرز، پیغامات اور دیگر ڈیجیٹل شواہد محفوظ رکھیں، جو جعلی لین دین کا سراغ لگانے اور رقم کی واپسی میں تفتیش کاروں کے لیے معاون ثابت ہو سکتے ہیں۔
بارہمولہ پولیس نے کہا کہ وہ سائبر ذرائع سے ہونے والے مالی جرائم سے نمٹنے کے لیے پرعزم ہے اور عوام سے اپیل کی کہ وہ آن لائن لین دین کرتے وقت مکمل احتیاط برتیں۔
۔۔۔۔۔۔(ایجنسیاں)
