سجیت کلکل نے مردوں کے 65 کلوگرام فری اسٹائل میں طلائی تمغہ جیتا

آئیچی ناگویا، 2 اکتوبر (یواین آئی) سجیت کلکل نے ناگویا سٹی اِنائے اسپورٹس سینٹر میں کھیلے گئے فائنل میں تاجکستان کے عبدالمجید قُدییف کو 10-9 سے شکست دے کر شاندار واپسی کے ساتھ مردوں کے 65 کلوگرام فری اسٹائل کا طلائی تمغہ جیت لیا۔ مقابلے میں ایک منٹ 40 سیکنڈ باقی رہتے سجیت 2-9 سے پیچھے تھے، لیکن انہوں نے مسلسل تین ٹیک ڈاؤن کرکے اسکور 9-8 کردیا۔
عبدالمجید وقت گزارنے کی کوشش کررہے تھے، لیکن آخری 11 سیکنڈ میں سجیت نے دو پوائنٹس والا ایک اور ٹیک ڈاؤن حاصل کرکے 10-9 کی برتری بنالی اور مقابلہ اپنے نام کرلیا۔
اس کامیابی کے ساتھ ہندوستان نے ایشین گیمز میں 2018 کے جکارتہ کھیلوں کے بعد کشتی میں اپنا پہلا طلائی تمغہ جیتا۔ جکارتہ میں بجرنگ پونیا اور وینیش پھوگاٹ نے ہندوستان کے لیے طلائی تمغے جیتے تھے۔ بجرنگ نے بھی مردوں کے 65 کلوگرام فری اسٹائل زمرے میں طلائی تمغہ حاصل کیا تھا۔
اس سے قبل سجیت نے سیمی فائنل میں موجودہ اولمپک چیمپئن جاپان کے کوٹارو کیوکا کو شکست دے کر بڑا اپ سیٹ کیا تھا۔ پیرس 2024 اولمپکس میں 65 کلوگرام فری اسٹائل کا طلائی تمغہ جیتنے والے کیوکا پہلے پیریڈ کے بعد 2-0 سے آگے تھے، لیکن دوسرے پیریڈ میں سجیت نے تین پوائنٹس حاصل کرکے مقابلہ 3-3 سے برابر کردیا۔ آخری پوائنٹ حاصل کرنے کی بنیاد پر سجیت نے تکنیکی معیار کے تحت کامیابی حاصل کرکے فائنل میں جگہ بنائی۔
سجیت کو ابتدائی مقابلے میں بھی واپسی کرنا پڑی تھی۔ راؤنڈ آف 16 میں افغانستان کے سید عمر جاجئی نے 3-0 کی برتری حاصل کی، لیکن سجیت نے اس کے بعد کوئی پوائنٹ نہیں گنوایا اور تکنیکی برتری کی بنیاد پر 13-3 سے کامیابی حاصل کی۔ کوارٹر فائنل میں انہوں نے ایران کے عباس ابراہیم زادہ ساد کوہی کو تکنیکی برتری کی بنیاد پر 10-0 سے شکست دی۔
سجیت ایشین گیمز میں ہندوستان کے اہم تمغے کے دعویداروں میں شامل تھے۔ انہوں نے 65 کلوگرام زمرے میں 2025 انڈر 23 عالمی چیمپئن شپ اور 2026 ایشین ریسلنگ چیمپئن شپ کا خطاب جیتا تھا۔ عبدالمجید کے خلاف یہ اس سال ان کا دوسرا مقابلہ تھا۔ اس سے قبل 2026 ایشین ریسلنگ چیمپئن شپ کے سیمی فائنل میں سجیت نے تاجک پہلوان کو 7-2 سے شکست دی تھی۔
دوسری جانب ہندوستانی پہلوان رجت روہل، پریا ملک اور دیپانشی اپنے ابتدائی مقابلے ہار گئے۔ مردوں کے 125 کلوگرام فری اسٹائل میں روہل کو قزاقستان کے انڈر 20 عالمی چیمپئن یدیگے قاسم بیک نے 8-3 سے شکست دی، جبکہ خواتین کے 76 کلوگرام میں پریا ملک کو کرغزستان کی موجودہ چیمپئن ایپیری میدیت کِزی نے 6-1 سے ہرایا۔
خواتین کے 50 کلوگرام زمرے میں دیپانشی کو جاپان کی چار بار کی عالمی چیمپئن اور اولمپک طلائی تمغہ فاتح یوئی سوساکی نے 11-0 سے شکست دی۔