کوسل مینڈس کی سنچری اور ویلالیج کی 3 وکٹوں کی بدولت سری لنکا نے ون ڈے سیریز برابر کردی

لیڈز، 25 ستمبر (یو این آئی): کوسل مینڈس (121) اور دونیتھ ویلالیج (3 وکٹ) کی شاندار کارکردگی کی بدولت سری لنکا نے دوسرے ایک روزہ میچ میں انگلینڈ کو 16 رن سے شکست دے کر 3 میچوں کی سیریز برابر کردی۔ کوسل مینڈس کو ان کی شاندار سنچری کے لیے ’میچ کا بہترین کھلاڑی‘ قرار دیا گیا۔
سری لنکا نے 6 وکٹ پر 321 رن کا دفاع کرتے ہوئے میزبان ٹیم کو 9 وکٹ پر 305 رن تک روک کر مقابلہ اپنے نام کیا۔ کوسل مینڈس نے 121 رن بنا کر ٹیم کی قیادت کی، جبکہ کامندو مینڈس (54) اور پون رتنائیکے (48) نے ان کا اچھا ساتھ دیا۔ انگلینڈ کی جانب سے ٹام بینٹن، بین ڈکیٹ، جوس بٹلر اور ول جیکس نے نصف سنچریاں بنائیں، لیکن آخر میں وہ ہدف سے پیچھے رہ گئے۔
انگلینڈ نے ہدف کا تعاقب کرتے ہوئے تیز شروعات کی۔ ڈکیٹ اور بینٹن نے پہلے پاور پلے میں کئی چوکے لگائے۔ دونوں نے پہلے 10 اووروں میں مجموعی طور پر 14 چوکے لگائے اور میزبان ٹیم کا اسکور بغیر کسی نقصان کے 82 رن تک پہنچا دیا۔ اسیتھا فرنانڈو نے اپنے پہلے 2 اووروں میں 23 رن دیے، دلشان مدوشنکا نے اپنے پہلے 2 اووروں میں 22 رن لٹائے اور دیگر گیند بازوں نے بھی کافی رن دیے، جس کی وجہ سے انگلینڈ نے زبردست شروعات کی۔ ڈکیٹ سب سے پہلے نصف سنچری تک پہنچے اور انہوں نے 44 گیندوں میں یہ مقام حاصل کیا۔ بینٹن نے ایشان ملنگا کی گیندوں پر ایک چوکا اور ایک چھکا لگایا، جس کی مدد سے انگلینڈ نے 14ویں اوور میں 100 رن مکمل کیے۔ انہوں نے 39 گیندوں میں نصف سنچری مکمل کی اور اس کے بعد سچندو کولمبگے کی گیندوں پر 2 چھکے لگائے۔
سلامی بلے بازوں نے 20 اووروں کے اندر 143 رن جوڑے، لیکن اس کے بعد دونیتھ ویلالیج نے تیزی سے صورتحال بدل دی اور سری لنکا کو میچ میں واپس لے آئے۔ انہوں نے ڈکیٹ کو 67 رن پر بولڈ کرکے ابتدائی شراکت توڑی، اگلے اوور میں بینٹن کو 73 رن پر اسٹمپ آؤٹ کرایا اور پھر انگلینڈ کے سفید گیند کے کپتان ہیری بروک کو ایل بی ڈبلیو کرکے اہم وکٹ حاصل کی۔ انگلینڈ کا اسکور بغیر کسی نقصان کے 143 رن سے گر کر 3 وکٹ پر 157 رن ہوگیا۔ بٹلر اور جو روٹ نے ٹیم کو سنبھالا۔ وکٹ کیپر بلے باز باؤنڈریوں اور چھکوں کی بارش کے ساتھ جوابی حملہ کرتے رہے، لیکن انگلینڈ کو ایک اور جھٹکا لگا جب کولمبگے نے روٹ کو 15 رن پر آؤٹ کردیا۔