گوا کے 97 ووٹروں کے نام بحال کرنے کی درخواست کو دہلی سے نہیں ملی اجازت: کانگریس

نئی دہلی، 24 ستمبر (یو این آئی) کانگریس نے کہا ہے کہ گوا کے چیف الیکٹورل آفیسر نے ای سی آئی نیٹ سافٹ ویئر سے ہٹائے گئے 97 جائز ووٹروں کے نام دوبارہ شامل کرنے کے لیے سات دنوں میں آٹھ بار الیکشن کمیشن کو لکھا ہے لیکن درخواستوں نظرانداز کر کے ووٹروں کے نام بحال نہیں کیے جا رہے ہیں۔
کانگریس شعبہ مواصلات کے انچارج جے رام رمیش نے جمعرات کے روز سوشل میڈیا ایکس پر کہا کہ گوا کے الیکٹورل رجسٹریشن افسران نے ان ووٹروں کے جائز ہونے کی تصدیق کی تھی۔ انہوں نے کہا کہ پوری خصوصی تفصیلی نظر ثانی (ایس آئی آر) کا عمل ای سی آئی نیٹ سافٹ ویئر کے حوالے کر دیا گیا ہے۔ دہلی سے ریاستوں کے قریب 12 کروڑ ووٹروں کے نام ہٹا دیے گئے ہیں یا ہٹائے جا سکتے ہیں۔ مسٹر رمیش نے کہا کہ الیکٹورل رجسٹریشن افسران کی ای سی آئی نیٹ سافٹ ویئر تک رسائی محدود کرنا غیر قانونی مرکزیت کی طرف ایک قدم ہے جبکہ عوامی نمائندگی قانون، 1950 کے تحت ووٹر فہرست پر آئینی و قانونی اختیار الیکٹورل رجسٹریشن افسر کا ہوتا ہے۔ انہوں نے کہا کہ نئے ووٹروں کو جوڑنے کے لیے فارم-6 کا عمل بھی مشکل کر دیا گیا ہے۔ کانگریس رہنما نے کہا کہ اس کے لیے چیف الیکشن کمشنر گیانیش کمار ذمہ دار ہیں اور انہیں فوری طور پر استعفیٰ دینا چاہیے۔