جی 4 ممالک نے اقوام متحدہ کی سلامتی کونسل میں جلد اصلاحات کا مطالبہ دہرایا

نئی دہلی، 24 ستمبر (یواین آئی) ہندوستان، برازیل، جرمنی اور جاپان – جی 4 ممالک کے وزرائے خارجہ نے اقوام متحدہ کی سلامتی کونسل میں جلد اصلاحات نافذ کرنے کی ضرورت پر زور دیا ہےوزارت خارجہ نے جمعرات کو بتایا کہ جی 4 ممالک کے وزراء نے اقوام متحدہ کی جنرل اسمبلی کے 81 ویں اجلاس کے موقع پر نیویارک میں ہونے والی میٹنگ میں کہا ہے کہ موجودہ سلامتی کونسل آج کی جغرافیائی و سیاسی صورتحال کی عکاسی نہیں کرتی ہے اور اس کی نمائندگی، جواز، ساکھ اور افادیت پر سوالات اٹھ رہے ہیں۔ جی 4 وزراء نے سلامتی کونسل میں اصلاحات پر بین حکومتی مذاکرات (آئی جی این) کے 80 ویں اجلاس کی بحث کا جائزہ لیا۔ انہوں نے کہا کہ بدلتے اور چیلنجنگ جیو پولیٹیکل ماحول میں سلامتی کونسل میں اصلاحات پہلے سے کہیں زیادہ ضروری ہو گئی ہیں۔
جی 4 گروپ نے کہا کہ سلامتی کونسل کی مستقل اور غیر مستقل، دونوں زمروں میں رکنیت کی توسیع اصلاحات کا اہم حصہ ہے۔ انہوں نے افریقہ، ایشیا-پسیفک اور لاطینی امریکہ و کیریبیائی جیسے کم نمائندگی والے یا نمائندگی سے محروم علاقوں اور گروپوں کی دونوں زمروں میں بہتر شرکت پر زور دیا۔ وزراء نے آئی جی این کے 80 ویں اجلاس کے دوران افریقی گروپ کی جانب سے پیش کیے گئے اصلاحاتی ماڈل کا خیرمقدم کیا اور سلامتی کونسل میں افریقہ کو بہتر نمائندگی دینے کے معاملے کی حمایت دہرائی، جس میں مستقل رکنیت بھی شامل ہے۔
جی 4 نے کہا کہ 18 سال کی سرگرمیوں کے باوجود سلامتی کونسل حقیقی اصلاحات کی سمت میں ٹھوس نتائج دینے میں کافی حد تک ناکام رہی ہے۔ وزراء نے گزشتہ آئی جی این اجلاس میں ہونے والی پیشرفت کی کمی پر بھی تشویش کا اظہار کیا اور مذاکرات شروع ہونے سے پہلے پیش کی گئی نام نہاد ‘برجنگ تجویز’ پر شدید اعتراض درج کرایا۔ ان کے مطابق، یہ تجویز دونوں زمروں میں رکنیت کی توسیع کے حق میں واضح اکثریت والے رکن ممالک کے نظریات کو مدنظر نہیں رکھتی۔ جی 4 ممالک نے آگے دیگر اصلاحات کے حامی گروپوں کے ساتھ تعاون بڑھانے اور مشترکہ ماڈل تیار کرنے کی بات کہی۔
میٹنگ میں برازیل کے وزیر خارجہ ماؤرو ویرا، جرمنی کے وزیر خارجہ جوہان ڈیوڈ واڈیفول، ہندوستان کے وزیر خارجہ ایس جے شنکر اور جاپان کے وزیر خارجہ موتیگی توشیمتسو نے حصہ لیا۔ انہوں نے کہا کہ اصلاحات پر بحث صرف آئی جی این تک محدود نہیں رہنی چاہیے۔