بجاج فنسرو نے 16 سالہ تیراک دھنیدھی دیسنگو کو اپنی ٹیم میں شامل کیا

نئی دہلی، 24 ستمبر (یواین آئی) بجاج فائن سرو لمیٹڈ نے تیراکی کے شعبے میں قدم رکھنے کا اعلان کرتے ہوئے 16 سالہ ہندوستانی تیراک دھنیدھی دیسنگو کو اپنی ٹیم میں شامل کیا ہے۔ وہ ہندوستان کی ٹاپ رینک والی تیراک ہیں اور پیرس 2024 اولمپک کھیلوں میں ہندوستانی دستے کی سب سے کم عمر رکن تھیں۔
کمپنی نے کہا کہ وہ کھیلوں کے ابتدائی مرحلے میں سرمایہ کاری کرنا چاہتی ہے، جب مناسب مدد سے کھلاڑیوں کے کھیل اور کیریئر کو بہتر سمت دی جاسکتی ہے۔ بجاج فائن سرو کا مقصد مشترکہ جذبے، توانائی اور عزم کو ایک مقصد کے لیے متحد کرکے ہندوستان میں تیراکی اور دیگر ابھرتے کھیلوں کے معیار کو بلند کرنا ہے۔
بنگلورو میں پلی بڑھی دھنیدھی نے چھ سال کی عمر میں تیراکی شروع کی اور کوچ نہار امین کی نگرانی میں جونیئر سطح پر تیزی سے ترقی کی۔ 14 سال کی عمر میں انہوں نے پیرس اولمپکس میں ڈیبیو کیا۔ 2025 نیشنل گیمز میں انہوں نے 11 تمغے جیتے، جن میں نو طلائی تمغے شامل تھے۔ اس وقت ان کے نام 100 میٹر، 200 میٹر اور 400 میٹر فری اسٹائل میں قومی ریکارڈ ہیں۔ پیرس اولمپکس کے بعد انہوں نے 200 میٹر فری اسٹائل کا اپنا ریکارڈ 2:04.24 سے بہتر کرکے 2:01.81 کردیا ہے۔
بجاج فائن سرو کے گروپ چیف مارکیٹنگ آفیسر اور بجاج فائننس لمیٹڈ کے صدر (ڈیجیٹل پلیٹ فارمز) مانَو میانوال نے کہا کہ کھیلوں کے شاندار سفر کا آغاز پوڈیم تک پہنچنے سے بہت پہلے ہوجاتا ہے۔ انہوں نے کہا کہ دھنیدھی نے اولمپکس میں ہندوستان کی نمائندگی کرنے کے ساتھ ورلڈ ایکواٹکس میں بھی اپنی شناخت بنائی ہے اور کمپنی ان کے کیریئر کے ابتدائی اور اہم برسوں میں مسلسل تعاون کرنا چاہتی ہے۔
دھنیدھی دیسنگو نے بجاج فائن سرو کا شکریہ ادا کرتے ہوئے کہا کہ اس مرحلے پر کمپنی کی حمایت سے انہیں اعتماد اور تحریک ملی ہے۔ انہوں نے کہا کہ وہ سخت محنت، مسلسل سیکھنے اور بڑے عالمی مقابلوں میں ہندوستان کی نمائندگی کرتے ہوئے تیراکی میں مزید کامیابیاں حاصل کرنا چاہتی ہیں۔