انیمیش کُجور اور گروندر ویر سنگھ 100 میٹر کے سیمی فائنل میں داخل

آئچی ناگویا، 24 ستمبر (یواین آئی) ہندوستان کے انیمیش کُجور نے اپنی ہیٹ میں 10.36 سیکنڈ کا وقت نکال کر تیسرا مقام حاصل کرتے ہوئے مردوں کی 100 میٹر دوڑ کے سیمی فائنل میں جگہ بنا لی۔ گروندر ویر سنگھ نے بھی اپنی ہیٹ میں دوسرے مقام پر رہتے ہوئے سیمی فائنل کے لیے کوالیفائی کیا۔ انہوں نے 10.38 سیکنڈ کا وقت درج کیا۔ سیمی فائنل جمعہ کو ہوگا۔
تین ہیپٹاتھلون مقابلوں کے بعد پوجا اور انامیکا بالترتیب آٹھویں اور نویں مقام پر ہیں۔ ہندوستان کی پوجا نے ہیپٹاتھلون کے شاٹ پٹ مقابلے میں 11.44 میٹر کی بہترین تھرو کے ساتھ چوتھا مقام حاصل کیا اور 624 پوائنٹس حاصل کیے۔ انامیکا کے اے 11.15 میٹر کی بہترین تھرو کے ساتھ آٹھویں مقام پر رہیں اور 605 پوائنٹس حاصل کیے۔ تین مقابلوں کے بعد پوجا 2385 پوائنٹس کے ساتھ ہیپٹاتھلون اسٹینڈنگ میں آٹھویں جبکہ ان کی ہم وطن انامیکا 2376 پوائنٹس کے ساتھ نویں مقام پر ہیں۔
انامیکا نے ہیپٹاتھلون کے ہائی جمپ میں 1.74 میٹر کی بہترین کوشش کے ساتھ دوسرا مقام حاصل کیا اور 903 پوائنٹس حاصل کیے۔ پوجا 1.71 میٹر کی بہترین کوشش کے ساتھ مشترکہ طور پر چوتھے مقام پر رہیں اور انہیں 867 پوائنٹس ملے۔