خواتین اور ٹرانسجینڈرز کو ملیں گے 1,300 گلابی ای-آٹو

نئی دہلی، 23 ستمبر (یو این آئی) دہلی حکومت نے خواتین اور ٹرانسجینڈر افراد کو مالی طور پر بااختیار بنانے نیز محفوظ اور صاف ستھرے ٹرانسپورٹ کو فروغ دینے کے لیے درگا ای-آٹو اسکیم کو منظوری دے دی ہے۔
وزیر اعلیٰ ریکھا گپتا کی صدارت میں بدھ کے روز منعقدہ کابینہ کی میٹنگ میں ڈرائیونگ اپ لفٹمنٹ اینڈ روزگار فار وومن/ٹرانسجینڈر گرین ای-آٹو (درگا) اسکیم کو منظوری دی گئی۔ اسکیم کے پہلے مرحلے میں 1,300 گلابی الیکٹرک آٹو مختص کیے جائیں گے، جن میں 1,170 خواتین اور 130 ٹرانسجینڈر مستفیدین کے لیے ہوں گے۔ وزیر اعلیٰ نے کہا کہ اسکیم کے تحت خواتین اور ٹرانسجینڈر افراد کو الیکٹرک آٹو کے مالک اور ڈرائیور بننے کا موقع ملے گا۔ اس کا مقصد باوقار روزگار اور روزی روٹی کے مواقع فراہم کرنے کے ساتھ ساتھ خواتین کی سلامتی، ٹرانسپورٹ کے شعبے میں ٹرانسجینڈر افراد کی شمولیت، آخری چھور تک کنیکٹیویٹی نیز صاف ستھرے اور دیرپا شہری ٹرانسپورٹ کو فروغ دینا ہے۔ اسکیم کے تحت رجسٹرڈ ای-آٹو پر خاص درگا برانڈنگ اور شناخت سے متعلق خصوصیات ہوں گی، جس سے مسافر ان گاڑیوں کو آسانی سے پہچان سکیں گے۔
اسکیم کے لیے خواتین کی عمر 20 سے 40 سال، دہلی کا رہائشی ہونا، درست ووٹر آئی ڈی کارڈ، ایل ایم وی ڈرائیونگ لائسنس اور پی ایس وی بیج ہونا ضروری ہو گا۔ تین سے زیادہ بچوں والی خاتون اہل نہیں ہوں گی۔ امیدوار یا اس کے خاندان کے پاس رجسٹرڈ ٹرانسپورٹ گاڑی یا تھری ویلر نہیں ہونا چاہیے نیز مالیاتی سال 26-2025 میں خاندان کی آمدنی پانچ لاکھ روپے سے زیادہ نہیں ہونی چاہیے۔ ٹرانسجینڈر امیدواروں کے لیے ڈسٹرکٹ مجسٹریٹ کے دفتر سے جاری کردہ درست ٹرانسجینڈر سرٹیفکیٹ کے علاوہ یکساں عمر، رہائش، ووٹر آئی ڈی کارڈ، ایل ایم وی لائسنس اور پی ایس وی بیج سے متعلق شرائط ہوں گی۔ درخواست کے لیے مخصوص آن لائن پورٹل بنایا جائے گا۔