جنوبی چھتیس گڑھ کے دور دراز علاقوں میں جلد دوڑے گی ٹرین، تاروکی-راوگھاٹ ریل سیکشن پر لائن بچھانے کا کام مکمل

نئی دہلی، 23 ستمبر (یو این آئی) جنوبی چھتیس گڑھ کے دور دراز علاقوں میں رہنے والے لوگ جلد ہی ٹرینوں کا سفر کر سکیں گے۔ ابھی تک ریل سروس سے محروم تاروکی-راوگھاٹ اب ٹرین کی پٹریوں کے ذریعے ریاست کے اہم صنعتی اور تعلیمی مراکزی مراکز سے جڑ گیا ہے۔
جنوب-مشرق-وسطیٰ ریلوے کے رائے پور ڈویژن کے تحت دَلّی راجہرا-راوگھاٹ نئی ریل لائن پروجیکٹ کے آخری حصے تاروکی-راوگھاٹ (ایک سنگل لائن والی بجلی سے چلنے والی براڈ گیج لائن) کا کام مکمل ہو گیا ہے۔ ریلوے نے بدھ کے روز بتایا کہ اس ریل سیکشن کا ریلوے سیفٹی کمشنر (سی آر ایس) نے منگل کے روز معائنہ کیا اور اسپیڈ ٹیسٹ بھی کیا گیا۔ اس پروجیکٹ کے شروع ہونے سے رائے پور اور بھلائی کے ساتھ ریل رابطہ مضبوط ہوگا، جس سے تعلیم، صحت کی دیکھ بھال، روزگار اور تجارت تک رسائی میں سدھار آئے گا۔
ریلوے نے بتایا کہ یہ ریلوے لائن بھلائی اسٹیل پلانٹ تک لوہا پہنچانے میں مدد کرے گی، جس سے ملک میں اسٹیل کی صنعت کو فروغ ملے گا۔ یہ ریلوے لائن زرعی مصنوعات اور مقامی تجارتی سامان کی منتقلی میں بھی مدد کرے گی اور دیہی نیز دور دراز علاقوں کو بڑے ریل نیٹ ورک سے جوڑنے میں اہم کردار ادا کرے گی۔ اس سے رائے پور اور ریاست کے تعلیمی مرکز بھلائی کے ساتھ اس علاقے کا رابطہ کافی بہتر ہوگا۔ اس طرح، بہتر ریل رابطے سے شہریوں کو تعلیم، صحت، روزگار اور تجارت سے جڑے مواقع تک پہنچنے میں آسانی ہوگی۔
ریل ٹرانسپورٹ کی توسیع سے علاقے میں سیاحت، سرمایہ کاری اور دیگر اقتصادی سرگرمیوں کو بھی فروغ ملے گا۔ اس سے تجارتی سرگرمیوں کو بھی تقویت ملے گی اور علاقے کی اقتصادی نیز سماجی ترقی میں مدد ملے گی۔