چار ریاستوں کی 28 قانون ساز کونسل سیٹوں پر 23 اکتوبر کو ہوگی پولنگ

نئی دہلی، 22 ستمبر (یو این آئی) الیکشن کمیشن نے منگل کے روز بہار، کرناٹک، مہاراشٹر اور اتر پردیش کی قانون ساز کونسلوں کی گریجویٹ اور ٹیچرز حلقوں سے خالی ہونے والی 28 سیٹوں پر دو سالہ انتخاب کا اعلان کیا ہے۔
کمیشن کے مطابق انتخاب کے لیے نوٹیفکیشن 29 ستمبر کو جاری ہوگا، جبکہ نامزدگی داخل کرنے کی آخری تاریخ چھ اکتوبر مقرر کی گئی ہے۔ کاغذات نامزدگی کی جانچ سات اکتوبر کو ہوگی اور نام واپس لینے کی آخری تاریخ نو اکتوبر رہے گی۔ متعلقہ انتخابی حلقوں میں 23 اکتوبر کو ووٹ ڈالے جائیں گے۔ ووٹنگ صبح آٹھ بجے سے شام چار بجے تک ہوگی۔
الیکشن کمیشن کے مطابق ووٹوں کی گنتی 27 اکتوبر کو کی جائے گی۔ پورا انتخابی عمل 31 اکتوبر تک مکمل کر لیا جائے گا۔ کمیشن نے انتخابی شیڈول جاری کرتے ہوئے متعلقہ حلقوں میں انتخابی ضابطہ عمل فوری طور پر نافذ ہونے کی بھی اطلاع دی ہے۔
کمیشن نے کہا کہ انتخاب سے متعلق تفصیلی معلومات اس کی سرکاری ویب سائٹ پر دستیاب ہیں۔ انتخابی حلقوں میں انتخابی عمل کے دوران تمام متعلقہ فریقوں کو نافذ العمل قواعد و ضوابط اور ماڈل کوڈ آف کنڈکٹ کی پاسداری کرنی ہوگی۔
کمیشن کے مطابق بہار کی آٹھ سیٹوں پر انتخاب ہوگا جن میں چار گریجویٹ اور چار ٹیچرز حلقے کی ہیں ۔اسی طرح کرناٹک کی 4 سیٹیں (2 گریجویٹ، 2 ٹیچرز)، مہاراشٹر کی 5 سیٹیں (3 گریجویٹ، 2 ٹیچرز) اور اتر پردیش کی 11 سیٹیں (5 گریجویٹ، 6 ٹیچرز) شامل ہیں۔