برطانیہ:رشی سناک کی خاتون حریف پر تنقید اور سالگرہ کی مبارک باد

لندن//
برطانیہ میں وزارتِ عظمیٰ کی دوڑ میں شامل دونوں حریف شخصیات رشی سناک اور لز ٹرس کے درمیان کانٹے کا مقابلہ جاری ہے۔
تفصیلات کے مطابق برطانیہ میں کنزرویٹیو پارٹی کی قیادت اور وزیر اعظم کے عہدے کی دوڑ میں قیادت کے دونوں امیدواروں سابقہ سیکریٹری خارجہ لز ٹرس اور بھارتی نژاد رشی سناک کے درمیان کانٹے کا مقابلہ ہو رہا ہے۔
مباحثے کے دوران جہاں دونوں نے ایک دوسرے پر خوب تنقید کی، وہیں رشی سناک نے لز ٹرس کو سالگرہ کی مبار ک باد بھی دی۔
رشی سناک نے مباحثے کے دوران لز ٹرس پر زبردست حملے کیے، دونوں امیدواروں کے درمیان سب سے بڑی جنگ ٹیکس کے معاملے پر ہے، رشی سناک نے کہا کہ لز ٹرس کا ٹیکس کٹوتی کا منصوبہ نہ صرف لاکھوں لوگوں کے لیے بلکہ خود اگلے انتخابات میں ان کی اپنی پارٹی کے لیے مصیبت بنے گا۔
تنقید کے بعد لز ٹرس نے ان پر جوابی وار کیے، سابقہ سیکریٹری خارجہ کا مؤقف تھا کہ ٹیکس میں اضافہ کساد بازاری کا باعث بنے گا۔
تاہم، زبردست مباحثے کے بعد رشی سناک نے اچانک حریف لز ٹرس کو سال گرہ کی مبارک باد دے دی، واضح رہے کہ لز ٹرس 47 سال کی ہو گئی ہیں۔