مودی نے 9/11 حملے کے متاثرین کوپیش کیا خراجِ عقیدت، کہا- دہشت گردی کے خلاف ہندوستان کا پختہ عزم

نئی دہلی، 11 ستمبر (یو این آئی) وزیراعظم نریندر مودی نے امریکہ میں 11 ستمبر 2001ء کو ہوئے دہشت گردانہ حملوں کی 25ویں برسی پر جمعہ کے روز متاثرین کو خراجِ عقیدت پیش کیا اور کہا کہ ہرطرح کی دہشت گردی کے خلاف ہندوستان کا موقف ’ اٹل‘ ہے۔
نریندر مودی نے امریکہ میں حملوں میں مارے گئے لوگوں کو یاد کرتے ہوئے کہا کہ دنیا کو متاثرین کا احترام کرنا چاہیے اور ان خاندانوں کے ساتھ کھڑا ہونا چاہیے، جن کی زندگی ان واقعات کی وجہ سے خوفناک ہو گئی ہے۔ وزیراعظم مودی نے سوشل میڈیا پلیٹ فارم ایکس پر ایک پوسٹ میں کہا، "9/11 حملوں کے 25 سال مکمل ہونے پر ہم متاثرین کو یاد کرتے ہوئے انہیں خراجِ عقیدت پیش کرتے ہیں نیز ان خاندانوں کے ساتھ یکجہتی کے ساتھ کھڑے ہیں، جن کی اس حملے کے بعد زندگی ہمیشہ کے لیے بدل گئی۔”
وزیراعظم نے کہا کہ دہشت گردی نے دنیا بھر میں ان گنت لوگوں کی جان لی ہے اور اس سے نمٹنے میں ہندوستان کا طویل تجربہ رہا ہے، خصوصاً سرحد پار دہشت گردی کے تناظر میں۔ نریندر مودی نے کہا، "سرحد پار دہشت گردی کے متاثرہ ملک کے طور پر ہندوستان کئی دہائیوں سے اس لڑائی میں پیش پیش رہا ہے۔” انہوں نے کہا کہ دہشت گردانہ خطرہ مسلسل بدل رہا ہے، ایسے میں بین الاقوامی تعاون کو برقرار رکھنا اور اجتماعی طور پر مضبوط ردِعمل دینا انتہائی ضروری ہے۔
انہوں نے کہا، "خطرہ اگرچہ مسلسل بدل رہا ہے لیکن دہشت گردی کی تمام شکلوں اور مظاہر کے خلاف ہمارا عزم اور مخالفت اٹل ہے۔ ہم اس بحران سے نمٹنے کی تمام کوششوں کے ساتھ یکجہتی کے ساتھ کھڑے ہیں۔” نریندر مودی نے اپنے پیغام کے ساتھ 2014ء میں نیویارک میں واقع 9/11 میموریل اینڈ میوزیم کے اپنے دورے کی کچھ تصاویر بھی شیئر کیں اور حملوں کے متاثرین سے منسوب اس جگہ کے ساتھ اپنے لگاؤ کو یاد کیا۔
قابلِ ذکر ہے کہ امریکہ میں 11 ستمبر 2001ء کے حملے چار مسافر طیاروں کے اغواء کے ذریعے کیے گئے تھے، جن میں تقریباً 3,000 افراد کی موت ہوئی تھی۔ ان حملوں نے عالمی سکیورٹی نظام کو ہلا کر رکھ دیا تھا۔ اس کے بعد دہشت گردی کے خلاف جامع بین الاقوامی مہم شروع ہوئی اور دنیا بھر میں دہشت گردی مخالف اور سکیورٹی پالیسیوں میں بڑی تبدیلیاں کی گئیں۔ نریندر مودی نے کہا کہ ہندوستان دہائیوں سے دہشت گردی اور سرحد پار تشدد کے مسلسل چیلنج کا سامنا کرتا رہا ہے، یہ برسی عالمی سطح پر ہم آہنگ ردِعمل کی اس کی بار بار کی گئی اپیل کو بھی اجاگر کرتی ہے۔ نئی دہلی مسلسل دہشت گرد تنظیموں، ان کے مالیاتی نیٹ ورکس، محفوظ ٹھکانوں اور انہیں ملنے والے دیگر قسم کے تعاون کے خلاف ہم آہنگ بین الاقوامی کارروائی کی وکالت کرتا رہا ہے۔
وزیراعظم کے تبصرے ہندوستانیوں کے اس موقف کی دوبارہ توثیق کرتے ہیں کہ بین الاقوامی برادری کو دہشت گردی کی کسی بھی شکل، ذریعہ یا اس کے پیچھے موجود لوگوں کی پروا کیے بغیر، اس کے خلاف مسلسل اور مضبوط موقف اختیار کرنا چاہیے نیز بے گناہ لوگوں کی جانیں جانے سے روکنے کے لیے اجتماعی کوششوں کو مضبوط کرنا چاہیے۔