مودی کی تین دن میں پوتن، جن پنگ، پزشکیان سمیت متعدد ممالک کے رہنماؤں کے ساتھ دو طرفہ میٹنگیں

نئی دہلی، 11 ستمبر (یو این آئی) وزیراعظم نریندر مودی جمعہ سے اتوار تک متعدد ممالک کے سربراہانِ مملکت و حکومت نیز بین الاقوامی تنظیموں کے سربراہوں کے ساتھ دو طرفہ میٹنگیں کریں گے نریندر مودی آج روس کے صدر ولادیمیر پوتن، ایران کے صدر مسعود پزشکیان اور اقوامِ متحدہ کے سکریٹری جنرل انتونیو گترش کے ساتھ بات چیت کریں گے۔ یہ تمام میٹنگیں قومی دارالحکومت میں ہو رہے دو روزہ 18ویں برکس سربراہ اجلاس کے موقع پر ہوں گی۔ یہ تمام رہنما ہفتہ کے روز سے شروع ہونے والے برکس اجلاس میں شرکت کے لیے آ رہے ہیں۔
وزیراعظم ہفتہ کو ایتھوپیا کے وزیراعظم ابی احمد علی، ملیشیا کے وزیراعظم انور ابراہیم، ابوظہبی کے ولی عہد شہبزادہ شیخ خالد بن محمد بن زاید آل نہیان اور ویتنام کے وزیراعظم لے منہ ہونگ کے ساتھ ملاقات کریں گے۔ اسی دن صدرِ جمہوریہ کی ایران کے صدر مسعود پزشکیان کے ساتھ راشٹرپتی بھون میں بھی ملاقات ہوگی۔ کل شام وزیراعظم چین کے صدر شی جن پنگ کے ساتھ بھی دو طرفہ میٹنگ کریں گے۔
اتوار کو وزیراعظم قازقستان کے صدر قاسم جومارٹ ٹوکایو، فلپائن کے صدر فرڈینینڈ آر مارکوس جونیئر، مصر کے صدر عبدالفتاح السیسی، جنوبی افریقہ کے صدر ماتامیلا سیرل رامافوسا، برونڈی کے صدر ایوارسٹے ندایشیمیئے، نائجیریا کے نائب صدر کاشم شیٹیما اور یوگانڈا کی نائب صدر جیسیکا الوپو کے ساتھ میٹنگ کریں گے۔
وزیراعظم کی جمعہ اور ہفتہ کی تمام میٹنگیں بھارت منڈپم اور حیدرآباد ہاؤس میں ہوں گی، جبکہ صدرِ جمہوریہ کی میٹنگ راشٹرپتی بھون میں ہوگی۔ اتوار کو وزیراعظم کی تمام میٹنگیں بھارت منڈپم میں طے ہیں۔