سوشل میڈیا انفلوئنسر بھاردواج حراست میں

نئی دہلی، 05 ستمبر (یو این آئی) دہلی پولیس نے سوشل میڈیا انفلوئنسر سوتنتر بھاردواج کو جمعہ کے روز اتر پردیش کے بلند شہر سے حراست میں لے لیا۔
پولیس نے کہا تھا کہ نِشو آزاد کے والد پر مبینہ حملے کے معاملے میں بھاردواج کے خلاف کارروائی کی جائے گی۔ اس رپورٹ کے لکھے جانے تک پولیس نے بھاردواج کی حراست کی باضابطہ تصدیق نہیں کی تھی۔ یہ حراست ‘کاکروچ جنتا پارٹی’ (سی جے پی) کے اراکین کو دہلی پولیس کے اس یقین دہانی کے کچھ گھنٹے بعد ہوئی، جس میں پولیس نے بھاردواج کے خلاف کارروائی کا مطالبہ کرنے والے اراکین سے کہا تھا کہ اسے 72 گھنٹے کے اندر گرفتار کر لیا جائے گا۔
اتر پردیش میں انفلوئنسر کا سراغ لگانے کے لیے پولیس کی متعدد ٹیمیں تعینات کی گئی تھیں۔ اس سے پہلے، پولیس ذرائع نے آج بتایا کہ بھاردواج موٹر سائیکل کے ذریعے نیتھلا گاؤں سے نکلا تھا اور کھورجہ کی طرف گیا تھا۔ بتایا جا رہا ہے کہ علاقے سے نکلتے وقت اس نے ہیلمٹ پہن رکھا تھا تاکہ اس کی شناخت نہ ہو سکے۔ اسے تلاش کرنے کے لیے سادہ کپڑوں میں پولیس ٹیمیں تعینات کی گئی تھیں۔
پولیس کی یہ کارروائی ایک پوڈ کاسٹ کو لے کر ہونے والے تنازع کے بعد ہوئی ہے، جس میں بھاردواج نے مبینہ طور پر دعویٰ کیا تھا کہ جنتر منتر پر ہونے والے احتجاج کے دوران انہوں نے نِشو آزاد کے والد سنجے کمار پر حملہ کیا تھا۔ ان کے بیانات کے بعد احتجاج شروع ہو گئے اور ان کی گرفتاری کا مطالبہ اٹھنے لگا۔
بھاردواج نے کسی بھی غلط کام سے انکار کیا ہے اور کہا ہے کہ لوگوں کے ایک گروہ کے ذریعے گھیر لیے جانے کے بعد انہوں نے خود دفاع (سیلف ڈیفنس) میں ایسا کیا۔ انہوں نے دعویٰ کیا کہ انہیں پیٹ پیٹ کر مار ڈالے جانے کا ڈر تھا اور کہا کہ جب انہوں نے خود کو بچانے کی کوشش کی تو کمار کے سر پر چوٹ آ گئی۔ انہوں نے کمار کی چوٹوں کی سنگینی کے دعوؤں کو بھی غلط بتایا اور کہا کہ وہ تحقیقات میں تعاون کر رہے ہیں۔ انفلوئنسر نے یہ بھی الزام لگایا کہ سوشل میڈیا پر وائرل ہو رہی پوڈ کاسٹ کلپ کے ساتھ چھیڑ چھاڑ کی گئی ہے۔