لوک سبھا اراکین کی معطلی اپوزیشن کی آواز کو دبانے کی کوشش ہے : کانگریس

نئی دہلی// کانگریس نے کہا ہے کہ مانسون اجلاس کے لیے لوک سبھا سے اس کے چار اراکین پارلیمنٹ کی معطلی اپوزیشن کی آواز کو دبانے کی کوشش ہے ، لیکن حکومت چاہے جتنی بھی کوشش کرے وہ ان کے حقوق کو نہیں چھین سکتی۔
لوک سبھا میں کانگریس کے لیڈر ادھیر رنجن چودھری نے اپنی پارٹی کے چار لوک سبھا اراکین پارلیمنٹ کی معطلی پر کہا کہ یہ قدم اٹھا کر حکومت نے اپوزیشن کی آواز کو دبانے کی کوشش کی ہے لیکن ان کی کوئی بھی سازش کانگریس کی لڑائی کو کم نہیں کر سکے گی۔
مسٹر چودھری نے اسے جمہوری اقدار کو کمزور کرنے کا قدم قرار دیا اور کہا کہ ملک کا ہر شہری مہنگائی کی وجہ سے پریشان ہے ۔ کانگریس ملک کے مظلوم شہریوں کی آواز پارلیمنٹ میں اٹھانا چاہتی ہے لیکن حکومت اپوزیشن کی آواز کو دبانے کی کوشش کر رہی ہے اور اس سے کانگریس کی آواز دبنے والی نہیں ہے ۔
واضح رہے کہ پارلیمانی امور کے وزیر کی تجویز پر لوک سبھا نے آج کانگریس کے مانک ٹیگور، رامیا ہری داس، ٹی این پرتاپن اور جیوتی مانی کو مانسون اجلاس کی بقیہ مدت کے لیے ایوان کی کارروائی سے معطل کردیا ہے ۔