سرینگر/۱۹؍ اگست
جنوبی کشمیر کے اننت ناگ ضلع کے قاضی گنڈ علاقے میں بدھ کے روز ایک المناک واقعے میں پانچ سالہ بیٹے کو بچانے کی کوشش کے دوران ایک شخص نالہ سندران میں ڈوب کر جاں بحق ہوگیا۔
ایک عہدیدار نے بتایا کہ باپ بیٹا نسو بدرگنڈ علاقے میں ایک شادی کی تقریب میں شرکت کے لیے گئے تھے، جہاں بچہ اچانک پانی کے نالے میں گر گیا۔
پانچ سالہ عماد ظہور کو بچا لیا گیا اور فوری طور پر ایمرجنسی ہسپتال قاضی گنڈ منتقل کیا گیا، جہاں وہ زیرِ علاج ہے۔ بتایا گیا ہے کہ بچے کی حالت مستحکم ہے اور اسے ڈاکٹروں کی نگرانی میں رکھا گیا ہے۔
جاں بحق ہونے والے شخص کی شناخت نِگن پورہ کے رہائشی ظہور احمد گنائی کے طور پر ہوئی ہے، جو اپنے بیٹے کو بچانے کی کوشش کے دوران نالے میں ڈوب گیا۔
ادھر پولیس نے واقعے کا نوٹس لیتے ہوئے کارروائی شروع کردی ہے۔
۔۔۔۔۔
