سرینگر/۱۹؍ اگست
پیپلز ڈیموکریٹک پارٹی (پی ڈی پی) کی صدر محبوبہ مفتی نے بدھ کے روز بھارت میں امریکی سفیر سرجیو گور سے اپیل کی کہ وہ کشمیر کا دورہ کرنے کے حوالے سے امریکہ کی جانب سے جاری کردہ اعلیٰ ترین سطح کی سفری ایڈوائزری پر نظرِ ثانی کرتے ہوئے اسے واپس لیں۔
محبوبہ مفتی نے سوشل میڈیا پلیٹ فارم ایکس پر ایک پوسٹ میں کہا کہ کشمیر میں ہزاروں خاندان سیاحت پر انحصار کرتے ہیں اور سفری ایڈوائزری محض ایک انتباہ نہیں بلکہ ’’کشمیر اور دنیا کے درمیان ایک دیوار‘‘ ہے۔
امریکی سفیر سرجیو گور بدھ کی صبح دو روزہ دورے پر جموں و کشمیر اور لداخ پہنچے ہیں۔
محبوبہ مفتی نے اپنی پوسٹ میں کہا، ’’امریکی سفیر سرجیو گوکم از کم اتنا کرسکتے ہیں کہ کشمیر کا دورہ کرنے کے خلاف جاری کردہ اعلیٰ ترین سطح کی سفری ایڈوائزری پر نظرِ ثانی کرکے اسے واپس لے لیں۔‘‘
سابق وزیر اعلیٰ نے کہا کہ کشمیر کے لیے یہ سفری ایڈوائزری محض ایک انتباہ نہیں، کیونکہ یہاں ہزاروں خاندان اپنی روزی روٹی کے لیے سیاحت پر منحصر ہیں۔
انہوں نے کہا، ’’یہ کشمیر اور دنیا کے درمیان ایک دیوار ہے۔ اسے ہٹانا اعتماد کا ایک مضبوط پیغام ہوگا، بین الاقوامی سیاحوں کی واپسی میں مدد کرے گا اور ان بے شمار خاندانوں کو انتہائی ضروری راحت فراہم کرے گا جن کا ذریعۂ معاش سیاحت سے وابستہ ہے۔‘‘
۔۔۔۔۔۔
ایجنسیاں
