جموں؍۱۷؍اگست
فوج کی شمالی کمان کے سربراہ لیفٹیننٹ جنرل پرتیک شرما نے پیر کے روز جموں و کشمیر کے پونچھ ضلع میں لائن آف کنٹرول کے ساتھ اگلے مورچوں کا دورہ کیا اور ابھرتے ہوئے سکیورٹی چیلنجوں سے نمٹنے کے لیے مسلسل چوکس رہنے اور اختراعی طریقے اپنانے کی ضرورت پر زور دیا۔
فوج کے مطابق، جنرل آفیسر کمانڈنگ اِن چیف نے فارمیشنز کی آپریشنل تیاریوں کا جائزہ لیا اور سرحدوں کی حفاظت پر مامور جوانوں سے بھی بات چیت کی۔
اودھم پور میں قائم شمالی کمان نے سوشل میڈیا پلیٹ فارم ’ایکس‘ پر ایک پوسٹ میں کہا، ’’لیفٹیننٹ جنرل شرما نے پونچھ میں اگلے مورچوں کا دورہ کیا اور فارمیشن کی آپریشنل تیاریوں کا جائزہ لیا۔ دورے کے دوران انہیں موجودہ سکیورٹی صورتحال، آپریشنل تیاری اور دشوار گزار علاقے میں تعیناتی کے چیلنجوں کے بارے میں بریفنگ دی گئی۔‘‘
فوج نے بتایا کہ شمالی کمان کے سربراہ نے اگلے علاقوں میں تعینات جوانوں سے بات چیت کی اور دشوار گزار جغرافیائی حالات اور موسم کے باوجود مشن کے لیے ہمہ وقت تیار رہنے میں ان کی ثابت قدمی کو سراہا۔
لیفٹیننٹ جنرل شرما نے جوانوں پر مسلسل چوکس رہنے اور باہمی تال میل کو مزید مضبوط بنانے کی ضرورت پر زور دیا۔
دریں اثنا، ایک اور پوسٹ میں شمالی کمان نے بتایا کہ ہائر ڈیفنس مینجمنٹ کورس کے طلبہ نے اودھم پور میں کمان ہیڈکوارٹرز کا دورہ کیا۔
فوج کے مطابق، ’’ان اسکالر واریئرز کو موجودہ سکیورٹی ماحول، آپریشنل تقاضوں، انسداد دہشت گردی کی صورتحال، آپریشنل لاجسٹکس، ٹیکنالوجی کے استعمال اور کمان کی صلاحیتوں کی ترقی سے متعلق بریفنگ دی گئی۔‘‘
۔۔۔۔۔۔۔۔
(ویب ڈیسک )
