سرینگر] ۱۷ ؍اگست
جموں و کشمیر اور پنجاب میں پیش آئے دو الگ الگ سڑک حادثات میں ایک نوعمر لڑکے سمیت چار افراد ہلاک اور متعدد زخمی ہوگئے۔
راجوری ضلع میں متعدد گاڑیوں کے درمیان تصادم کے نتیجے میں ایک لڑکا ہلاک اور ۱۲ افراد زخمی ہوئے، جبکہ پنجاب کے جالندھر ضلع میں ایک سڑک حادثے میں سری نگر کے بٹہ مالو علاقے کے دو باشندوں سمیت تین افراد جان سے گئے۔
راجوری میں حادثہ پیر کے روز راجوری قصبے کے قریب جموں۔پونچھ قومی شاہراہ پر تندوَل کے مقام پر پیش آیا۔ حکام کے مطابق ایک دو پہیہ گاڑی پہلے ایک ٹیکسی اور آٹو رکشا سے ٹکرا گئی۔ اس کے بعد تین پہیہ گاڑی سڑک کے کنارے کھڑی پانچ گاڑیوں سے جا ٹکرائی۔
حادثے میں دو پہیہ گاڑی پر سوار تین لڑکوں سمیت مجموعی طور پر ۱۳ افراد زخمی ہوئے، جنہیں فوری طور پر گورنمنٹ میڈیکل کالج اسپتال منتقل کیا گیا۔ زخمیوں میں شامل ایک نوعمر لڑکا زخموں کی تاب نہ لاتے ہوئے دم توڑ گیا۔
دریں اثنا، پنجاب کے جالندھر ضلع کے بھوگ پور علاقے میں پیش آئے ایک المناک سڑک حادثے میں سری نگر کے بٹہ مالو علاقے کے دو باشندوں سمیت تین افراد ہلاک ہوگئے۔
ہلاک ہونے والے سری نگر کے دونوں باشندوں کی شناخت اخلاص قادر ولد غلام قادر اور انیک امین ولد محمد امین کے طور پر ہوئی ہے، جبکہ تیسرا مہلوک پنجاب کا رہائشی بتایا گیا ہے۔
حادثے کی خبر سے متوفین کے اہل خانہ اور مقامی برادری میں گہرے صدمے اور غم کی لہر دوڑ گئی۔
۔۔۔۔۔۔۔
(ویب ڈیسک )
