ای اسپورٹس ورلڈ کپ: ارجن ایریگئیسی اور نہال سرین ٹاپ آٹھ میں شامل

پیرس، 15 اگست (یواین آئی) ای اسپورٹس ورلڈ کپ 2026 کے شطرنج ٹورنامنٹ میں ہندوستانی چیلنج کوارٹر فائنل میں ختم ہوگیا۔ جین زی ای اسپورٹس کے ارجن ایریگئیسی اور ایس 8 یو ایل ای اسپورٹس کے نہال سرین ٹورنامنٹ کے ٹاپ آٹھ کھلاڑیوں میں شامل رہے۔ ارجن کو ٹیم فالکنز کے ہکارو ناکامورا نے ’آرماگیڈن‘ ٹائی بریکر میں شکست دی، جبکہ ٹیم لیکوئڈ کے دفاعی چیمپئن میگنس کارلسن نے نہال سرین کو 2.5-0.5 سے ہرا دیا۔
ہکارو کے خلاف ارجن کا کوارٹر فائنل مقابلہ گزشتہ سال تیسری پوزیشن کے میچ کا اعادہ تھا، جس میں امریکی گرینڈ ماسٹر نے کامیابی حاصل کی تھی۔ اس بار بھی دونوں کے درمیان سخت مقابلہ ہوا اور چاروں باقاعدہ گیمز برابر رہیں۔ اس کے بعد فیصلہ ’آرماگیڈن‘ ٹائی بریکر میں ہوا، جہاں سفید مہروں سے کھیلتے ہوئے ہکارو نے چیک میٹ کے ذریعے کامیابی حاصل کی اور سیمی فائنل میں جگہ بنالی۔
دوسرے کوارٹر فائنل میں نہال سرین کا مقابلہ میگنس کارلسن سے ہوا۔ یہ گزشتہ سال کے ناک آؤٹ مقابلے کا اعادہ تھا۔ کارلسن نے پہلے دو گیمز جیتے جبکہ تیسرا گیم برابر رہا، جس کے نتیجے میں انہوں نے 2.5-0.5 سے کامیابی حاصل کرکے سیمی فائنل میں جگہ بنالی۔
سیمی فائنل میں ہکارو ناکامورا کا مقابلہ ڈینس لازاوک سے ہوگا، جبکہ میگنس کارلسن کا سامنا علی رضا سے ہوگا۔ یہ گزشتہ سال کے فائنل کا اعادہ بھی ہوگا۔
ارجن اور نہال کے ٹاپ آٹھ میں جگہ بنانے پر دونوں کھلاڑیوں کو 75 ہزار ڈالر، یعنی تقریباً 71.5 لاکھ روپے کی انعامی رقم ملی۔
پلے آف سنگل ایلیمینیشن فارمیٹ میں جاری رہیں گے۔ سیمی فائنل چھ گیمز پر مشتمل ہوگا، جبکہ گرینڈ فائنل ’بیسٹ آف تھری‘ سیٹ فارمیٹ میں کھیلا جائے گا، جس میں پہلے دو سیٹ چار، چار گیمز پر مشتمل ہوں گے اور تیسرا سیٹ ہونے کی صورت میں اس میں دو گیمز ہوں گے۔