کانگریس ورکنگ کمیٹی کی اہم میٹنگ 19 اگست کو، طلباء کی تحریک اور آئندہ اسمبلی انتخابات پر بھی بحث ممکن

نئی دہلی 13 اگست (یو این آئی) کانگریس ورکنگ کمیٹی کی اہم میٹنگ 19 اگست کو طلب کی گئی ہے جس میں ملک کی موجودہ سیاسی صورتحال، کانگریس تنظیم میں مجوزہ تبدیلیوں اور آنے والے اسمبلی انتخابات کی تیاریوں کے تعلق سے وسیع غور و خوص کیا جائے گا۔
ذرائع کے مطابق میٹنگ میں پارٹی کی حکمت عملی اور تنظیم کو انتخابی چیلنجوں کے لیے مزید مضبوط کرنے پر بھی بحث ہونے کا امکان ہے۔ میٹنگ میں حال ہی کے دنوں میں طلباء کی تحریکوں اور دہلی پولیس پر طلباء کے خلاف مبینہ بربریت کے الزامات کا معاملہ بھی اٹھ سکتا ہے۔ کانگریس اس معاملے پر مرکزی حکومت پر مسلسل حملہ آور رہی ہے اور پارلیمنٹ میں بھی وزیر داخلہ سے جواب کا مطالبہ کر چکی ہے۔ اس کے علاوہ ایودھیا میں رام مندر سے جڑے مبینہ چندہ چوری کے الزامات پر بھی سی ڈبلیو سی میں بحث ہونے کا امکان ہے۔ کانگریس ان معاملات کو سیاسی اور عوامی مفاد کے نقطہ نظر سے اہم مان رہی ہے۔
میٹنگ میں کانگریس صدر ملکارجن کھرگے، سابق صدر سونیا گاندھی، لوک سبھا میں اپوزیشن لیڈر راہل گاندھی سمیت ورکنگ کمیٹی کے تمام اہم اراکین شامل ہوں گے۔