شنیڈر کو شکست دے کر سویتیک سیمی فائنل میں پہنچ گئیں

ٹورنٹو، 11 اگست (یواین آئی) پولینڈ کی ایگا سویتیک نے پیر کی شب ٹورنٹو میں ڈبلیو ٹی اے نیشنل بینک اوپن کے کوارٹر فائنل میں نمبر 15 سیڈ ڈیانا شنیڈر کو 6-2، 6-1 سے شکست دے کر سیمی فائنل میں جگہ بنا لی۔ نمبر سات سیڈ سویتیک نے 64 منٹ تک جاری رہنے والے مقابلے میں شنیڈر کو صرف تین گیمز جیتنے کا موقع دیا۔
سویتیک نے میچ کے بعد کہا کہ وہ کورٹ پر خود کو پُراعتماد محسوس کر رہی ہیں۔ انہوں نے کہا کہ انہیں اپنی پریکٹس اور تیاری پر بھروسہ ہے اور وہ ہر روز اپنی بہترین کارکردگی پیش کرنے، معمول برقرار رکھنے اور پوری توجہ کے ساتھ کھیلنے کی کوشش کر رہی ہیں۔
اس کامیابی کے ساتھ سویتیک نے ڈبلیو ٹی اے ٹور پر شنیڈر کے خلاف اپنا ریکارڈ 2-0 کرلیا اور 23ویں مرتبہ ڈبلیو ٹی اے 1000 کے سیمی فائنل میں جگہ بنائی۔ 2009 میں موجودہ فارمیٹ کے آغاز کے بعد سویتیک (48.9 فیصد) کے مقابلے میں صرف سرینا ولیمز (53.1 فیصد) زیادہ مرتبہ سیمی فائنل میں پہنچی ہیں۔ ڈبلیو ٹی اے 1000 کے سیمی فائنل میں سویتیک سے زیادہ مرتبہ پہنچنے والی صرف تین کھلاڑی ہیں—سیمونا ہالیپ (29)، سرینا ولیمز (26) اور وکٹوریا آزارینکا (24)۔ سویتیک 23 سیمی فائنل کے ساتھ اگنیسکا راڈوانسکا کے برابر ہیں۔
سویتیک نے ابتدائی گیم میں شنیڈر کی سروس توڑی اور اپنی سروس پر بھی مضبوط کھیل پیش کیا۔ اس کے بعد 5-2 کی برتری حاصل کرکے ایک بار پھر بریک کیا، جبکہ شنیڈر فورہینڈ پر متعدد غلطیوں کے باعث دباؤ میں آگئیں۔ ان کی آخری غلطی کے ساتھ ہی سویتیک نے پہلا سیٹ اپنے نام کرلیا۔
دوسرے سیٹ میں بھی صورتحال کچھ مختلف نہیں رہی۔ شنیڈر نے چند اچھے مواقع ضرور بنائے، لیکن سویتیک نے 2-1 کی برتری کے بعد ان کی سروس توڑ دی اور پھر پیچھے مڑ کر نہیں دیکھا۔ انہوں نے مسلسل آخری چھ گیمز جیت کر ایک گھنٹے سے کچھ زیادہ وقت میں میچ ختم کردیا۔
میچ کے بعد پریس کانفرنس میں سویتیک نے کہا، ’’آج میں نے صرف اپنے منصوبے پر عمل کیا۔ میں واقعی پوری طرح توجہ مرکوز کیے ہوئے تھی۔ مجھے لگتا ہے کہ اب میں پہلے سے بہتر انداز میں توجہ مرکوز کرپارہی ہوں۔ اپنے ریکیٹ پر گیند کو اچھی طرح محسوس کرنے کی وجہ سے میرے لیے اپنے منصوبے پر عمل کرنا بھی آسان ہوگیا ہے۔ یہ ایک اچھا ٹورنامنٹ ہے، جہاں زیادہ شور شرابا نہیں ہوتا اور آپ واقعی اپنے کھیل پر توجہ مرکوز کرسکتے ہیں۔ مجھے کورٹ پر کھیلنے میں بہت لطف آ رہا ہے۔‘‘