بحریہ کے سربراہ سمندری اور دفاعی تعلقات کو مضبوط بنانے کے لیے چار روزہ ماریشس کے دورے پر

نئی دہلی، 10 اگست (یو این آئی) بحریہ کے سربراہ ایڈمرل کرشنا سوامی ناتھن پیر کے روز سے ماریشس کے چار روزہ سرکاری دورے پر جا رہے ہیں جس کا مقصد ہندوستان اور ماریشس کے درمیان دوطرفہ سمندری تعاون اور دفاعی تعلقات کو مضبوط بنانا ہے۔
دورے کے دوران بحریہ کے سربراہ ماریشس حکومت کی سینئر قیادت کے ساتھ بات چیت کریں گے اور سمندری سکیورٹی، دفاعی تعاون، صلاحیت سازی اور فوجی تعاون پر تبادلۂ خیال کریں گے۔ اس بات چیت کا مقصد سمندری شعبے میں تعاون کو مضبوط بنانا، آپریشنل سطح کے رابطوں کو بڑھانا اور دونوں ممالک کے درمیان حکمتِ عملی کی شراکت داری کو استحکام بخشنا ہے۔ ہندوستان اور ماریشس کے درمیان تربیت کے تبادلے، مشترکہ خصوصی اقتصادی زون (ای ای زیڈ) کی نگرانی، بندرگاہوں کے دوروں اور ہائیڈروگرافک سروے کے ذریعے باقاعدہ بحری تعاون ہوتا ہے۔
ماریشس ہندستانی بحریہ کے مختلف پہلوں میں بھی حصہ لیتا ہے، جن میں انڈین اوشین نیول سمپوزیم، ملن، انٹرنیشنل فلیٹ ریویو، گوا میری ٹائم کنکلیو، آئی او ایس ساگر اور مشقیں شامل ہیں۔ عہدہ سنبھالنے کے بعد بحریہ کے سربراہ کا ماریشس کا یہ پہلا دورہ ہے، جو ماریشس کے ساتھ ہندوستان کی سمندری شراکت داری اور بحرِ ہند کے خطے میں سکیورٹی، تعاون اور استحکام کے لیے مشترکہ عزم کو ہندوستان کی جانب سے دی جانے والی اہمیت کو اجاگر کرتا ہے۔