ایران کے صوبے فارس میں موسلادھار بارشوں سے سیلاب، 18 افراد جاں بحق

فارس//
ایران کے صوبے فارس میں شدید بارشوں کے باعث آنے والے سیلاب سے کم از کم 18 افراد جاں بحق ہو گئے ہیں۔
عرب نیوز نے ایران کے سرکاری ٹی وی کے حوالے سے آج بروز ہفتہ خبر دی ہے کہ صوبہ فارس کے گورنر یوسف کاریگر نے بتایا کہ موسلادھار بارشوں کی وجہ سے استھبان شہر میں سیلاب کی صورت حال پیدا ہو گئی ہے۔ گورنر یوسف کاریگر کا مزید کہنا تھا ریسکیو اہلکاروں نے ان 55 افراد کو بچا لیا ہے جو سیلاب کے پانی میں پھنس گئے تھے تاہم ابھی تک چھ افراد لاپتہ ہیں۔
ایران کے محکمہ موسمیات کی جانب سے انتباہ جاری کیا گیا ہے کہ اس بار کئی دہائیوں سے خشک سالی کے شکار ملک میں شدید بارشیں ہوں گی۔ محکمہ موسمیات کی جانب سے یہ بھی کہا گیا ہے کہ یہ بارشیں موسمیاتی تبدیلیوں کی وجہ سے ہو رہی ہیں۔ شدید بارشوں کے باعث دریا کے کنارے بنی عمارات اور شاہراہوں کے لیے بھی خطرات بڑھ گئے ہیں۔
یاد رہے کہ 2019ء میں ایران کے جنوبی حصے میں آنے والے سیلاب کی تباہ کاریوں کے نتیجے میں کم از کم 76 افراد جاں بحق ہو گئے تھے۔