ادے پور میں 21 اکتوبر سے ہوگی سیلوٹ ترنگا کرکٹ لیگ

نئی دہلی، 10 اگست (یو این آئی) سیلوٹ ترنگا کرکٹ لیگ (ایس ٹی سی ایل) 21 سے 28 اکتوبر تک راجستھان کے ادے پور شہر میں منعقد کی جائے گی جس میں آٹھ ٹیمیں حصہ لیں گی اور ہر ٹیم میں 15 کھلاڑی شامل ہوں گے۔ اس لیگ کے لیے رجسٹریشن مفت رکھا گیا ہے۔
ایس ٹی سی ایل اسپورٹس اینڈ انٹرٹینمنٹ پرائیویٹ لمیٹڈ نے اس لیگ کی ویب سائٹ کو باضابطہ طور پر لانچ کرنے اور اوپن ٹرائلز کے ذریعے ملک گیر کرکٹ ٹیلنٹ سرچ مہم کا افتتاح کرنے کا پیر کے روز اعلان کیا۔ اس موقع پر لیگ کمشنر، سابق ہندوستانی کرکٹر اور بی سی سی آئی سلیکشن کمیٹی کے سابق چیئرمین چیتن شرما چیف گیسٹ کے طور پر موجود تھے۔ انہوں نے کہا کہ ’سیلوٹ ترنگا کرکٹ لیگ‘ ملک بھر کے نوجوان کرکٹرز کے لیے ایک بہترین پلیٹ فارم بننے جا رہی ہے۔ کئی سابق ہندوستانی کرکٹرز اس لیگ سے جڑیں گے اور ابھرتے ہوئے کھلاڑیوں کی حوصلہ افزائی کریں گے۔ انہوں نے مزید کہا ”کرکٹ نے ہمیں بہت کچھ دیا ہے؛ اب وقت آ گیا ہے کہ ہم ملک کے نوجوانوں کو کچھ واپس دیں“۔ سابق ہندوستانی ٹیسٹ کرکٹر اشوک ملہوترا نے کہا کہ یہ لیگ واقعی ایک مثال قائم کرے گی۔ انہوں نے کہا کہ اس لیگ میں حصہ لینے والے ہر کھلاڑی کا مستقبل بہت روشن ہوگا۔
ایس ٹی سی ایل کے چیئرمین راجیش جھا نے کہا کہ ایس ٹی سی ایل کا مقصد ملک بھر کے نوجوان اور باصلاحیت کرکٹ کھلاڑیوں کو اس پلیٹ فارم کے ذریعے کرکٹ میں کیریئر بنانے کا بہتر موقع دینا ہے۔ اوپن ٹرائل کے ذریعے منتخب کیے گئے کھلاڑیوں کے لیے سفر، قیام و طعام اور یونیفارم کا خرچ ایس ٹی سی ایل اٹھائے گی۔ منتخب کھلاڑیوں کو تجربہ کار کرکٹ ماہرین سے خاص تربیت اور رہنمائی بھی ملے گی، جس میں سابق ہندوستانی کرکٹر چیتن شرما سے تربیت اور مینٹورشپ پانے کا موقع بھی شامل ہے۔
راجیش جھا نے کہا کہ ”ہمارا ہدف یہ یقینی بنانا ہے کہ ٹیلنٹ کو موقع ملے اور ملک کے ہر کونے سے ابھرتے ہوئے کھلاڑیوں کو قومی سطح تک پہنچنے کا پلیٹ فارم ملے“۔ ایس ٹی سی ایل کے وائس چیئرمین روی چکارا نے کہا کہ یہ لیگ ہندوستانی کرکٹ کی تاریخ میں ایک میل کا پتھر ثابت ہوگی۔ اس پلیٹ فارم پر سابق بین الاقوامی ہندوستانی کرکٹرز کی شرکت اور حوصلہ افزائی نوجوان کھلاڑیوں کے لیے واقعی باعثِ تحریک ہوگی۔ ’سیلوٹ ترنگا کرکٹ لیگ‘ میں پورے ہندوستان سے 8 فرنچائز ٹیمیں شامل ہوں گی۔ لیگ کے تمام میچز راجستھان کے ناتھ دوارہ (ادے پور) میں واقع معراج کرکٹ اسٹیڈیم میں منعقد کیے جائیں گے۔ ’سیلوٹ ترنگا کرکٹ لیگ‘ کے اوپن ٹرائلز ملک کے ان اہم شہروں میں منعقد کیے جائیں گے۔ ٹرائلز میں حصہ لینے کے لیے رجسٹریشن مکمل طور پر مفت ہوگا۔