ہندوستان اور چین کے درمیان بات چیت مثبت سمت میں، لوگوں کے تعلقات بہتر بنانے کے لیے کئی اقدامات کیے گئے: وزارتِ خارجہ

نئی دہلی، 05 اگست (یو این آئی) ہندوستان نے چین کے ساتھ تعلقات کے بارے میں کہا ہے کہ دونوں ممالک کے درمیان بات چیت مثبت سمت میں آگے بڑھ رہی ہے اور لوگوں کے درمیان باہمی تعلقات بہتر بنانے کے لیے کئی اقدامات کیے گئے ہیں۔
وزارتِ خارجہ کے ترجمان نے منگل کے روز میڈیا بریفنگ میں چین میں سوشل میڈیا پر ہندوستان اور ہندوستانی ثقافت کے خلاف پروپیگنڈے سے متعلق سوال پر کہا کہ لوگوں کی سہولت کو مدِنظر رکھ کر کیلاش مانسروور یاترا اور ہوائی رابطے کی بحالی سمیت متعدد اقدامات کیے جا رہے ہیں۔ ان اقدامات سے تعلقات مزید مضبوط ہوں گے۔ ترجمان نے کہا، "دونوں ممالک کے درمیان بات چیت چل رہی ہے اور یہ بات چیت مثبت سمت میں آگے بڑھ رہی ہے۔ دونوں ممالک کے لوگوں کے درمیان تعلقات بہتر بنانے کے لیے کئی اقدامات کیے گئے ہیں۔ کیلاش مانسروور یاترا پھر سے شروع ہوئی ہے۔ دونوں ممالک کے درمیان ہوائی رابطہ بھی پھر سے بحال کیا گیا ہے، ساتھ ہی ایسے کئی دیگر اقدامات بھی کیے گئے ہیں۔ ہمارا ماننا ہے کہ ان اقدامات سے دونوں ممالک کے درمیان مثبت تعلقات مزید مضبوط ہوں گے۔”
قابلِ ذکر ہے کہ بیجنگ میں ہندوستانی سفارت خانے کے ایک پروگرام میں ہندوستانی برادری کے لوگوں نے سوشل میڈیا پر ہندوستان کے خلاف کی جانے والی باتوں پر تشویش کا اظہار کیا تھا۔ یہ پیش رفت سکرٹری خارجہ وکرم مسری کے گزشتہ ماہ کے دورۂ چین کے بعد کی ہے۔ مسٹر مسری نے وہاں چین کے نائب وزیرِ خارجہ کے ساتھ دوطرفہ تعلقات کے بارے میں تفصیل سے بات کی تھی۔