آئی آئی ایم بنگلورو میں خطاب/ خوشحالی کا راستہ کاروبار‘ اختراع، ادارہ جاتی اصلاحات اور زراعت میں ویلیو ایڈیشن سے ہو کر گزرتا ہے
(ویب ڈیسک )
سرینگر؍ یکم اگست
جموں و کشمیر کے وزیر اعلیٰ‘ عمر عبداللہ نے ہفتہ کو کہا کہ دنیا کا کوئی بھی معاشرہ صرف سرکاری ملازمتوں یا سرکاری اخراجات کی بنیاد پر کبھی خوشحال نہیں ہوا، بلکہ کاروباری سرگرمیاں ہی مواقع کو خوشحالی میں تبدیل کرتی ہیں۔
آئی آئی ایم بنگلورو ایلومنائی ایسوسی ایشن کے افتتاحی اجلاس سے بطور مہمانِ خصوصی خطاب کرتے ہوئے عمر عبداللہ نے کہا کہ جموں و کشمیر کا تجربہ یہ ثابت کرتا ہے کہ معاشرے اس وقت اپنی سمت بدلتے ہیں جب ادارے ایسے محرکات پیدا کرتے ہیں جو وقت کے ساتھ عام لوگوں کے فیصلوں کو متاثر کرتے ہیں۔
وزیر اعلیٰ نے کہا کہ جموں و کشمیر کا ذکر عموماً سیاست، سلامتی اور جغرافیہ کے تناظر میں کیا جاتا ہے، لیکن ان پہلوؤں کے پس منظر میں انسانی ترقی اور ساختی مشکلات کے باوجود عوام کی ثابت قدمی کی ایک اور اہم داستان بھی موجود ہے۔انہوں نے کہا، ’’اگر آپ کو صرف جموں و کشمیر کا جغرافیہ دکھایا جائے تو آپ یہی اندازہ لگائیں گے کہ یہ ایک ایسی معیشت ہے جو پہاڑی علاقوں، زیادہ نقل و حمل کے اخراجات، بکھری ہوئی آبادی، دشوار گزار راستوں اور محدود صنعت کاری کی وجہ سے شدید پابندیوں کا شکار ہے‘‘۔
وزیر اعلیٰ نے اس بات کی طرف اشارہ کیا کہ ان تمام مشکلات کے باوجود جموں و کشمیر میں اوسط عمر ملک کی بلند ترین شرحوں میں شامل ہے۔انہوں نے کہا، ’’میں اس نتیجے پر پہنچا کہ اس کی وجہ کوئی ایک سرکاری منصوبہ نہیں بلکہ ادارے ہیں۔ یہی ادارے ایسے محرکات پیدا کرتے ہیں جو لوگوں کے فیصلوں کی رہنمائی کرتے ہیں۔ ترقی کسی ایک حکومت یا ایک بجٹ کا نتیجہ نہیں ہوتی بلکہ یہ اداروں کی طویل مدتی محنت کا ثمر ہوتی ہے، جو یہ طے کرتی ہے کہ عام آدمی کی کوشش کو انعام ملے گا یا نہیں‘‘۔
عمرعبداللہ نے کہا کہ اکیسویں صدی میں سب سے اہم پیداواری سرمایہ اب زمین نہیں بلکہ ایسا کاروباری نظام ہے جسے علم، ٹیکنالوجی، توانائی اور بہتر رابطہ کاری کی حمایت حاصل ہو۔انہوں نے کہا، ’’کاروباری مواقع تک رسائی کو وسیع کرنا آج کے دور میں اسی طرح اہم ہے جیسے ماضی میں زمین تک رسائی کو وسیع کرنا تھا۔‘‘
وزیر اعلیٰ نے مزید کہا کہ حکومت کی مشن یووا پہل کا مقصد کاروبار شروع کرنے کے خواہش مند نوجوانوں کی نشاندہی کرنا اور انہیں مالی وسائل، منڈیوں اور رہنمائی سے جوڑنا ہے۔
عمر عبداللہ نے کہا کہ صرف ڈیجیٹل رابطہ کاری سے علاقائی تفاوت خود بخود ختم نہیں ہو جائے گا کیونکہ اب تک ٹیکنالوجی نے مواقع کو تقسیم کرنے کے بجائے چند مقامات تک محدود کیا ہے۔انہوں نے کہا کہ جموں و کشمیر کو باغبانی، دستکاری، سیاحت اور پن بجلی کے شعبوں میں اپنی موجودہ صلاحیتوں سے فائدہ اٹھاتے ہوئے بہتر لاجسٹکس، برانڈنگ اور ڈیجیٹل تجارت کے ذریعے صرف پیداوار بڑھانے کے بجائے اس کی قدر و قیمت میں اضافہ کرنا چاہیے۔
وزیر اعلیٰ نے صنعتی رہنماؤں کو جموں و کشمیر میں سرمایہ کاری کی دعوت دیتے ہوئے کہا، ’’آپ کو ہمارے جیسے علاقے میں اپنا دوسرا مرکز قائم کرنے کے لیے کیا چیز درکار ہوگی؟ مجھے رسمی یا حوصلہ افزا جواب نہیں بلکہ حقیقت پر مبنی جواب چاہیے۔‘‘
عمرعبداللہ نے کہا، ’’ہم بنگلورو سے مقابلے میں زیادہ مراعات نہیں دے سکتے اور نہ ہی کوئی خطہ اچانک ویسی رفتار حاصل کر سکتا ہے۔ تاہم ہماری پوزیشن والا علاقہ کسی پہلے سے ترقی کرتی ہوئی معیشت کے اتنا قریب ضرور پہنچ سکتا ہے کہ اس کی رفتار سے اپنا حصہ حاصل کر سکے۔‘‘
خطاب کے بعد سوال و جواب کے سیشن میں عمر عبداللہ نے کہا کہ حکومتوں کو سرخیوں میں جگہ بنانے والے اعلانات کے بجائے طویل مدتی ادارہ جاتی اصلاحات پر توجہ دینی چاہیے تاکہ جامع ترقی کو یقینی بنایا جا سکے۔
ایک سوال کے جواب میں کہ جموں و کشمیر میں سب سے زیادہ غیر استعمال شدہ صلاحیت کس شعبے میں موجود ہے، انہوں نے کہا کہ زراعت اور اس سے وابستہ سرگرمیوں میں سب سے زیادہ امکانات ہیں۔انہوں نے کہا، ’’حقیقت یہ ہے کہ ہماری معیشت کا سب سے بڑا حصہ سیاحت نہیں، نہ دستکاری ہے اور نہ ہی ٹیکنالوجی۔ ہماری معیشت کی بنیاد دراصل زراعت ہے۔ جموں و کشمیر ایک زرعی معاشرہ ہے۔‘‘
وزیر اعلیٰ نے کہا کہ ویلیو ایڈیشن کی سطح اب بھی بہت کم ہے اور جموں و کشمیر میں پیدا ہونے والے دودھ کا صرف سات فیصد حصہ ہی پراسیس کیا جاتا ہے۔انہوں نے کہا کہ ڈیری پروسیسنگ، فصلوں کی برداشت کے بعد کے انتظامات، سیب کے علاوہ دیگر فصلوں کی کاشت اور بلیو بیری جیسی فصلوں کی پیداوار میں نمایاں ترقی کے وسیع امکانات موجود ہیں۔
فٹ بال سے متعلق ایک سوال کے جواب میں وزیر اعلیٰ نے کہا کہ جموں و کشمیر میں اس کھیل کو غیر معمولی مقبولیت حاصل ہے۔انہوں نے کہا، ’’ہم کرکٹ سے زیادہ فٹ بال کھیلتے ہیں۔ میرے خیال میں یہاں صلاحیت بھی ہے اور ٹیلنٹ بھی۔‘‘
عمرعبداللہ نے مزید کہا کہ جموں و کشمیر میں فٹ بال کی سرگرمیوں کو دوبارہ فروغ دینا ایک ایسا مقصد ہے جسے حکومت ضرور آگے بڑھانا چاہتی ہے۔
