ایجنسیاں
سرینگر؍۳۰جولائی
جموںو کشمیر حکومت نے۲۰۱۶کی عوامی بے چینی کے دوران پیلیٹ گن سے بینائی سے محروم ہونے والی انشا مشتاق کی ایل پی جی ڈسٹری بیوٹری کو فعال بنانے کے لیے۴۱ء۱۶لاکھ روپے منظور کیے ہیں۔
خوراک، شہری رسد اور امورِ صارفین کے وزیر ستیش شرما نے جمعرات کو کہا ’’انصاف میں تاخیر ضرور ہوئی، لیکن انصاف سے انکار نہیں کیا گیا‘‘۔
شرما نے سوشل میڈیا پلیٹ فارم ایکس پر ایک پوسٹ میں کہا’’انشا مشتاق نے۲۰۱۶ میں پیلیٹ لگنے کے باعث اپنی بینائی کھو دی تھی۔ انہیں۲۰۱۸ میں ایل پی جی ڈسٹری بیوٹری الاٹ کی گئی تھی، لیکن یہ منصوبہ نامکمل رہ گیا۔ وزیر اعلیٰ عمر عبداللہ کی قیادت میں اب اس منصوبے کو منطقی انجام تک پہنچانے کے لیے بقایا۴۱ء۱۶ لاکھ روپے جاری کرنے کی منظوری دے دی گئی ہے‘‘۔
قابل ذکر ہے کہ جنوبی کشمیر کے ضلع شوپیان سے تعلق رکھنے والی انشا مشتاق۲۰۱۶ میں حزب المجاہدین کے اُس وقت کے کمانڈر برہان وانی کی ہلاکت کے بعد وادی میں پھوٹ پڑنے والے احتجاجی مظاہروں کے دوران پیلیٹ گن کی زد میں آ کر اپنی دونوں آنکھوں کی بینائی سے محروم ہو گئی تھیں۔
