طلبہ و عملے کی حفاظت کیلئے خراب موسمی حالات کے پیشِ نظر ڈوڈہ اور کشتواڑ کے بیشتر علاقوں میں تعلیمی ادارے بند
(ویب ڈیسک)
سرینگر؍۲۹جولائی
محکمۂ موسمیات نے پیش گوئی کی ہے کہ جموں و کشمیر میں آئندہ ایک ہفتے کے دوران مزید بارشوں کا سلسلہ جاری رہنے کا امکان ہے۔
اس دوران حساس علاقوں میں اچانک سیلاب (فلیش فلڈ)، لینڈ سلائیڈنگ اور مٹی کے تودے گرنے کے خطرے کے پیشِ نظر۲۹ جولائی سے۲؍ اگست تک الرٹ جاری کیا گیا ہے۔
محکمۂ موسمیات کے مطابق گزشتہ۲۴ گھنٹوں کے دوران مرکز کے زیرِ انتظام علاقے میں سب سے زیادہ۸۷ ملی میٹر بارش سامبا میں ریکارڈ کی گئی، جبکہ کٹرا میں۷۱ء۲ملی میٹر، ادھم پور میں۶۵ ملی میٹر اور جموں میں۵۲ ملی میٹر بارش ہوئی۔
محکمہ نے بتایا کہ۲۹ سے۳۱ جولائی کے دوران بیشتر علاقوں میں ہلکی سے درمیانی درجے کی بارش اور گرج چمک کے ساتھ بوندا باندی متوقع ہے، جبکہ جموں ڈویژن کے چند مقامات پر بالخصوص صبح اور دوپہر کے بعد سے شام تک تیز اور موسلا دھار بارش ہونے کا بھی امکان ہے۔
پیش گوئی کے مطابق اس دوران کشمیر کے بعض علاقوں میں بھی مختصر وقفوں کے لیے شدید بارش ہو سکتی ہے۔
محکمۂ موسمیات نے مزید کہا ہے کہ یکم اور۲؍اگست کو بھی کئی مقامات پر ہلکی سے درمیانی بارش اور گرج چمک کے ساتھ بادل برسنے کا امکان ہے، جبکہ چند الگ تھلگ علاقوں میں شدید بارش کے مختصر سلسلے بھی دیکھنے کو مل سکتے ہیں۔
اسی طرح۳ سے۵؍اگست کے دوران بھی بیشتر علاقوں میں ہلکی سے درمیانی بارش اور گرج چمک متوقع ہے، جبکہ جموں ڈویژن کے چند اضلاع میں شدید بارش، موسلا دھار بارش اور انتہائی تیز بارش ہونے کا امکان ظاہر کیا گیا ہے۔
محکمۂ موسمیات نے خبردار کیا ہے کہ۲۹ جولائی سے۲؍ اگست کے درمیان بعض مقامات پر ہونے والی موسلا دھار اور شدید بارشوں کے نتیجے میں اچانک سیلاب، لینڈ سلائیڈنگ اور مٹی کے تودے گرنے کے واقعات پیش آ سکتے ہیں۔
محکمہ نے عوام، سیاحوں، مسافروں اور ٹرانسپورٹروں کو ہدایت دی ہے کہ وہ انتظامیہ کی جانب سے جاری کردہ مشوروں پر عمل کریں، غیر ضروری طور پر دریاؤں، ندی نالوں اور دیگر آبی ذخائر کے قریب جانے سے گریز کریں اور لینڈ سلائیڈنگ کے خدشے والے علاقوں میں سفر سے حتیٰ الامکان احتراز کریں۔
اس دوران خراب موسمی حالات کے پیشِ نظر جموں و کشمیر انتظامیہ نے بدھ کے روز ضلع ڈوڈہ اور ضلع کشتواڑ کے بیشتر علاقوں میں تمام سرکاری اور نجی اسکول احتیاطی طور پر بند رکھنے کا حکم جاری کیا ہے۔
حکام کے مطابق دونوں اضلاع میں طلبہ اور تدریسی عملے کی تعلیمی سرگرمیاں متاثر نہ ہوں، اس لیے اسکولوں کو آن لائن کلاسیں جاری رکھنے کی ہدایت دی گئی ہے۔
ضلع ترقیاتی کمشنر ڈوڈہ کی ہدایات پر چیف ایجوکیشن آفیسر (سی ای او) ڈوڈہ نے ایک حکم نامہ جاری کرتے ہوئے کہا کہ۲۹ جولائی کو ضلع بھر کے تمام سرکاری اور نجی اسکول طلبہ اور عملے کی حفاظت کو یقینی بنانے کے لیے بند رہیں گے۔
ادھر ملحقہ ضلع کشتواڑ میں بھی ضلعی انتظامیہ نے مسلسل موسلا دھار بارش، پھسلن زدہ سڑکوں اور پہاڑوں سے پتھر گرنے کے خدشے کے پیشِ نظر تمام سرکاری اور نجی اسکول بند رکھنے کا حکم دیا۔تاہم انتظامیہ نے کشتواڑ شہر کے اندر مالی پیٹھ سے چیرہر تک واقع اسکولوں کو اس حکم سے مستثنیٰ قرار دیتے ہوئے انہیں کھلا رکھنے کی اجازت دی ہے۔
حکام کے مطابق چناب وادی کے اضلاع ڈوڈہ، کشتواڑ اور رام بن میں بدھ کی صبح تقریباً۵ بجے سے درمیانی سے شدید بارش کا سلسلہ شروع ہوا۔انہوں نے بتایا کہ محکمۂ موسمیات کی جانب سے۳۱؍جولائی تک درمیانی سے شدید بارش کی پیش گوئی کے بعد انتظامیہ صورتحال پر مسلسل نظر رکھے ہوئے ہے۔
دریں اثنا، کشمیر کو ملک کے باقی حصوں سے جوڑنے والی اہم جموں،سرینگر قومی شاہراہ مسلسل بارش کے باوجود ٹریفک کے لیے کھلی رہی۔
