جموں و کشمیر کے پہلے بین الاقوامی فلمی میلے کیلئےآج اندراج کا آخری دن جاری؛میلہ۷سے۱۰ستمبر تک سرینگر میں ہو گا
(ڈی آئی پی آر )
سرینگر؍۲۹ جولائی
جموں کشمیر کے پہلے بین الاقوامی فلمی میلے (انٹرنیشنل فلم فیسٹیول آف جموں اینڈ کشمیر آئی ایف ایف جے کے۲۰۲۶ ) کو دنیا بھر کے فلم سازوں کی جانب سے زبردست پذیرائی حاصل ہوئی ہے۔ اب تک تقریباً۵۰ ممالک سے۸۷۵ فلمی اندراجات موصول ہو چکے ہیں، جو جموں و کشمیر حکومت کی اس اہم فلمی پہل میں عالمی دلچسپی کی عکاسی کرتے ہیں۔
فلمی میلے کے لیے اندراجات جمع کرانے کی آخری تاریخ۳۰ جولائی۲۰۲۶ مقرر کی گئی ہے، جس کے تحت فلم سازوں کو افتتاحی ایڈیشن میں شرکت کے لیے اپنی فلمیں رجسٹر کرانے کا آخری موقع فراہم کیا جا رہا ہے۔
محکمہ اطلاعات و تعلقاتِ عامہ (ڈی آئی پی آر) کی جانب سے نیشنل فلم ڈیولپمنٹ کارپوریشن (این ایف ڈی سی) کے اشتراک سے منعقد ہونے والا یہ فلمی میلہ۷ سے۱۰ ستمبر۲۰۲۶ تک جاری رہے گا۔
اس فلمی میلے کا مقصد جموں و کشمیر کو سینما، تخلیقی صلاحیتوں اور ثقافتی تبادلے کا ایک متحرک عالمی مرکز بنانا ہے، جبکہ دنیا بھر کے فلم سازوں کو اپنی تخلیقات پیش کرنے کے لیے ایک باوقار پلیٹ فارم فراہم کرنا بھی اس کا اہم ہدف ہے۔
ملک اور بیرونِ ملک سے فلم سازوں کی جانب سے ملنے والا حوصلہ افزا ردِعمل اس بات کا مظہر ہے کہ جموں و کشمیر ایک ابھرتے ہوئے فلم پروڈکشن مرکز، سینمائی مہارت اور تخلیقی اشتراک کے طور پر عالمی اعتماد حاصل کر رہا ہے۔
تقریباً۵۰ ممالک سے موصول ہونے والی متنوع فلمیں اس میلے کو مختلف ثقافتوں کی کہانیوں، منفرد فنی نقطۂ نظر اور جدید فلم سازی کے تجربات سے مالا مال کریں گی۔
چار روزہ فلمی میلے کے دوران منتخب فلموں کی نمائش کے علاوہ انٹرایکٹو سیشنز، ماسٹر کلاسز، پینل مباحثے اور ثقافتی سرگرمیاں بھی منعقد کی جائیں گی، جن کے ذریعے فلم سازوں، ماہرینِ صنعت، طلبہ اور سینما سے وابستہ افراد کو خیالات کے تبادلے اور نئے تخلیقی تعاون کے مواقع میسر آئیں گے۔
آئی ایف ایف جے کے کو فنی معیار کے فروغ، ثقافتی مکالمے کو مضبوط بنانے اور جموں و کشمیر کے شاندار ثقافتی ورثے، قدرتی حسن اور تخلیقی صلاحیتوں کو عالمی سطح پر متعارف کرانے کی جانب ایک اہم قدم تصور کیا جا رہا ہے۔
اس فلمی میلے کا مقصد سینما کے ذریعے جموں و کشمیر کی ثقافت کو فروغ دینا، فنی مہارت، ثقافتی تبادلے اور فلمی اختراع کی حوصلہ افزائی کرنا اور دنیا بھر سے بہترین فلموں کی نمائش اور ان کی پذیرائی کو یقینی بنانا بھی ہے۔
اس کے علاوہ میلے کا ایک اہم ہدف مختلف ممالک کی فلمی ثقافتوں کو ان کے سماجی اور ثقافتی پس منظر کے تناظر میں سمجھنے اور ان کی قدر و منزلت کو فروغ دینا، نیز سینما کے ذریعے دنیا کے مختلف خطوں کے عوام کے درمیان دوستی اور تعاون کو مضبوط بنانا بھی ہے۔
قابلِ ذکر ہے کہ اس فلمی میلے کی پری کرٹن ریزر تقریب۱۷ جولائی۲۰۲۶کو منعقد ہوئی تھی، جس میں وزیر اعلیٰ عمر عبداللہ نے جموں کشمیر کے پہلے بین الاقوامی فلمی میلے کا باضابطہ آغاز کرتے ہوئے دنیا بھر کے فلم سازوں، فنکاروں، پروڈیوسرز اور سینما سے دلچسپی رکھنے والے افراد کو اس تاریخی تقریب میں شرکت کی دعوت دی تھی۔
