پونچھ میں مٹی کا مکان منہدم‘ مزید۷؍ افراد جاں بحق؛ ہلاکتیں بڑھ کر۲۳
پونچھ لینڈ سلائیڈنگ سانحہ‘سنہا اظہارِ افسوس‘ فوری امداد کی ہدایت
(ویب ڈیسک )
جموں؍۲۰ جولائی
جموں خطے میں مسلسل موسلا دھار بارش، لینڈ سلائیڈنگ اور اچانک آنے والے سیلاب نے تباہی مچا دی ہے۔
پیر کے روز ضلع پونچھ کے لورن گاؤں میں لینڈ سلائیڈنگ کے باعث مٹی کا ایک مکان منہدم ہونے سے مزید سات افراد جاں بحق ہوگئے، جس کے بعد گزشتہ دو روز کے دوران بارش سے متعلق مختلف واقعات میں ہلاک ہونے والوں کی مجموعی تعداد بڑھ کر۲۳ ہوگئی ہے۔
ادھر پونچھ اور راجوری اضلاع میں خراب موسمی حالات کے باعث ریسکیو اور امدادی کارروائیاں شدید متاثر ہیں، جبکہ کم از کم سات افراد تاحال لاپتہ ہیں۔
حکام کے مطابق تازہ واقعہ پیر کی صبح پونچھ ضلع کے بالائی علاقے لورن گاؤں میں پیش آیا، جہاں مسلسل بارش کے دوران لینڈ سلائیڈنگ کی زد میں آکر مٹی سے تعمیر کیا گیا ایک رہائشی مکان مکمل طور پر منہدم ہوگیا۔ اس دلخراش حادثے میں سات افراد جان کی بازی ہار گئے، جن میں چار خواتین بھی شامل ہیں۔ واقعے کے بعد پولیس، فوج، ریاستی ڈیزاسٹر رسپانس فورس (ایس ڈی آر ایف) اور مقامی رضاکاروں نے فوری طور پر امدادی کارروائیاں شروع کیں، تاہم مسلسل بارش کے باعث ریسکیو آپریشن میں شدید مشکلات کا سامنا کرنا پڑ رہا ہے۔
اس تازہ سانحے سے قبل پیر کے روز بارش سے متعلق مختلف حادثات میں مزید چار افراد جاں بحق ہوئے تھے۔ ضلع ڈوڈہ میں صبح تقریباً۹بج کر۳۰ منٹ پر جموں۔کشتواڑ قومی شاہراہ پر رگی نالہ کے قریب ایک پہاڑی سے بھاری چٹان لڑھک کر ایک مسافر بس پر آگری، جس کے نتیجے میں منیش کمار ہلاک جبکہ سات افراد زخمی ہوگئے۔ ریسکیو کارروائی کے دوران بس سے ایک نامعلوم شخص کی لاش بھی برآمد ہوئی، جس کی شناخت کی کوششیں جاری ہیں۔ اس حادثے کے باعث قومی شاہراہ بھی بند ہوگئی، جبکہ دو نجی گاڑیاں بھی چٹانوں کی زد میں آئیں، تاہم ان میں سوار افراد محفوظ رہے۔
ایک اور حادثے میں ضلع ڈوڈہ کے کشتی گڑھ علاقے میں شیو دیوی نامی خاتون اپنے گھر کے قریب پہاڑی سے گرنے والے پتھر کی زد میں آکر جاں بحق ہوگئیں۔
ادھر راجوری کے سلانی علاقے میں اتوار کو فلیش فلڈ کے دوران بہہ جانے والے وقاص احمد کی لاش پیر کی صبح دریا سے برآمد کر لی گئی۔
حکام کے مطابق اتوار کو آنے والے اچانک سیلاب اور لینڈ سلائیڈنگ کے واقعات میں پونچھ میں۱۰؍ اور راجوری میں۲؍ افراد جاں بحق ہوئے تھے۔ تازہ سات ہلاکتوں کے بعد صرف پونچھ ضلع میں بارش سے ہونے والی اموات کی تعداد۱۷ تک پہنچ گئی ہے، جبکہ مجموعی طور پر جموں خطے میں گزشتہ دو روز کے دوران۲۳؍افراد اپنی جانیں گنوا چکے ہیں۔
حکام نے بتایا کہ پونچھ میں چھ جبکہ راجوری میں محکمہ جل شکتی کا ایک ملازم تاحال لاپتہ ہے، جن کی تلاش کے لیے ریسکیو ٹیمیں مسلسل کوششیں کر رہی ہیں۔
پونچھ اور راجوری اضلاع میں پیر کی صبح تقریباً۳ بجے دوبارہ شروع ہونے والی بارش آخری اطلاعات موصول ہونے تک بلا تعطل جاری رہی، جس کے باعث ندی نالوں میں طغیانی، راستوں پر پھسلن اور حد نگاہ میں کمی نے امدادی کارروائیوں کو انتہائی دشوار بنا دیا ہے۔
پولیس، فوج، ایس ڈی آر ایف، سول ڈیفنس کے اہلکار اور مقامی رضاکار خراب موسمی حالات کے باوجود متاثرہ علاقوں میں امدادی اور تلاش کی کارروائیاں جاری رکھے ہوئے ہیں۔
حکام نے خبردار کیا ہے کہ مسلسل بارشوں کے باعث مزید لینڈ سلائیڈنگ اور اچانک سیلاب کا خطرہ برقرار ہے، جس کے پیش نظر حساس علاقوں کے رہائشیوں کو انتہائی محتاط رہنے کی ہدایت دی گئی ہے۔
دریں اثنا محکمۂ موسمیات نے۲۳جولائی تک جموں و کشمیر میں درمیانی سے شدید بارش کی پیش گوئی کرتے ہوئے مختلف اضلاع کے لیے الرٹ جاری کیا ہے۔ ضلعی انتظامیہ نے عوام سے اپیل کی ہے کہ وہ دریا، ندی نالوں اور دیگر آبی ذخائر کے قریب جانے سے گریز کریں اور غیر ضروری سفر سے حتی الامکان اجتناب برتیں۔
وزیراعلیٰ عمر عبداللہ نے صورتحال کا جائزہ لیتے ہوئے تمام ضلعی انتظامیہ کو ہدایت دی ہے کہ۲۴ جولائی تک ہر چھ گھنٹے بعد صورتحال سے متعلق رپورٹ پیش کی جائے تاکہ امدادی سرگرمیوں اور حالات کی مؤثر نگرانی کو یقینی بنایا جا سکے۔ وزیراعلیٰ نے موسمی ہنگامی صورتحال سے نمٹنے کے لیے انتظامیہ کی تیاریوں کا بھی جائزہ لیا۔
اس دوران لیفٹیننٹ گورنر منوج سنہا نے ضلع پونچھ میں مسلسل بارش کے باعث پیش آئے المناک لینڈ سلائیڈنگ کے حادثے میں سات افراد کی ہلاکت پر گہرے رنج و غم کا اظہار کرتے ہوئے ضلعی انتظامیہ کو متاثرہ خاندانوں کے لیے فوری امداد، بازآبادکاری اور ہر ممکن تعاون فراہم کرنے کی ہدایت دی ہے۔
لیفٹیننٹ گورنر نے اپنے ایک تعزیتی پیغام میں کہا کہ مسلسل موسلا دھار بارش کے نتیجے میں پیش آنے والی اس المناک لینڈ سلائیڈنگ نے سات قیمتی جانیں چھین لی ہیں، جس سے پورا خطہ سوگوار ہے۔
سماجی رابطے کی ویب سائٹ ایکس پر جاری اپنے پیغام میں انہوں نے جاں بحق افراد کے اہل خانہ سے دلی تعزیت اور ہمدردی کا اظہار کرتے ہوئے دعا کی کہ اللہ تعالیٰ انہیں اس ناقابلِ تلافی نقصان کو برداشت کرنے کی ہمت اور صبر عطا فرمائے۔
لیفٹیننٹ گورنر نے اپنے پیغام میں کہا’’پونچھ میں شدید بارش کے باعث پیش آنے والی المناک لینڈ سلائیڈنگ میں سات قیمتی جانوں کا ضیاع انتہائی افسوسناک ہے۔ میں اس مشکل گھڑی میں سوگوار خاندانوں سے دلی تعزیت کا اظہار کرتا ہوں‘‘۔
سنہا نے سینئر انتظامی حکام کو ہدایت دی کہ متاثرہ خاندانوں تک فوری امداد پہنچائی جائے، انہیں ہر ممکن تعاون فراہم کیا جائے اور زمینی صورتحال پر مسلسل نظر رکھی جائے تاکہ امدادی کارروائیاں مؤثر انداز میں جاری رہیں۔
حکام کے مطابق یہ افسوسناک واقعہ ضلع پونچھ کے لورن علاقے کے دومیل ڈھوک نندی چول میں پیش آیا، جہاں مسلسل شدید بارش کے باعث ایک بڑے پیمانے پر لینڈ سلائیڈنگ ہوئی اور ملبے تلے دب کر خواتین اور بچوں سمیت سات افراد جان کی بازی ہار گئے۔
انتظامیہ نے متاثرہ علاقے میں فوری امدادی کارروائیاں شروع کر دی ہیں، جبکہ نقصانات کا تخمینہ لگانے کے ساتھ ساتھ متاثرہ خاندانوں تک ہر ممکن امداد بروقت پہنچانے کے اقدامات جاری ہیں۔
