گزشتہ پانچ برسوں میں کوآپریٹو نظام جدید، شفاف، ٹیکنالوجی سے بھرپور اور مسابقتی بن گیا ہے: شاہ
نئی دہلی،7جولائی (یواین آئی) مرکزی وزیرِ تعاون امت شاہ نے پیر کے روز کہا کہ کوآپریٹو کی وزارتِ نے گزشتہ پانچ برسوں کے دوران کوآپریٹو سیکٹر کے مسائل کی نشاندہی کرکے ان کے حل اور ترقی کے لیے ایک جامع روڈ میپ تیار کرتے ہوئے کوآپریٹو نظام کو جدید، شفاف، ٹیکنالوجی سے ہم آہنگ اور مسابقتی بنایا ہے۔
مسٹر شاہ نے یہاں وزارتِ کوآپریٹو کے پانچویں یومِ تاسیس کی تقریب سے خطاب کرتے ہوئے کہا کہ حکومت کی پالیسیوں سے کوآپریٹو سیکٹر سے وابستہ 30 کروڑ افراد کو نئی توانائی ملی ہے۔ کوآپریٹو نظام کو جدید، شفاف، تکنیکی طور پر ترقی یافتہ، اور مسابقتی بنایا گیا ہے۔ جب ملک 2047 میں آزادی کے سو سال منائے گا تو کوآپریٹو تحریک ’سمردھ بھارت‘ کی مضبوط بنیاد ہوگا۔
انہوں نے کہا کہ وزارت زراعت، ڈیری، بینکنگ، لاجسٹکس اور موبیلٹی جیسے شعبوں کو جوڑنے کے لیے قومی سطح پر نئی کوآپریٹو تنظیموں کا نیٹ ورک بنی، 32 کروڑ سے زائد اراکین کا ڈیجیٹل ڈیٹا بیس تیار کیا ہے اور نو قومی سطح کی کوآپریٹو سوسائٹیاں قائم کرکے دیہی سطح تک کوآپریٹو نظام کو ایک مضبوط زنجیر میں پرو دیا ہے۔ آئندہ دس برسوں میں یہ بین الاقوامی سطح کی سب سے بڑی کوآپریٹو تنظیم بنیں گی۔
وزیرِ تعاون نے کہا کہ کوآپریٹونظام کے ذریعے کسانوں کی پیداوار کو دیہات سے عالمی منڈی تک پہنچانے اور ہندستان کو بیجوں کی پیداوار میں سرکردہ بنانے کی سمت میں کام کیا جا رہا ہے۔ انہوں نے کہا کہ ہندستان بیج کوآپریٹوسوسائٹی آئندہ تین برسوں میں ملک کی سب سے بڑی بیج تیار کرنے والی کمپنی بنے گی اور ہر ریاست میں نئی اکائی سے کسانوں کو خالص اور بہتر بیج فراہم کیے جائیں گے۔
