کیرالہ لینڈ سلائیڈنگ، راحت اور بچاؤ کام میں ہر ممکن تعاون کی اپیل، ہر قدم پرمتاثرین کے ساتھ ہے کانگریس: پرینکا گاندھی

نئی دہلی، 07 جولائی (یو این آئی) کانگریس کی جنرل سکریٹری اور وائناڈ سے رکن پارلیمنٹ محترمہ پرینکا گاندھی واڈرا نے کیرالہ میں ہوئی لینڈ سلائیڈنگ پر گہرے دکھ کا اظہار کرتے ہوئے کہا ہے کہ ملبے میں پھنسے لوگوں کو محفوظ نکالنے کے لیے جنگی بنیادوں پر راحت اور بچاؤ مہم چلائی جا رہی ہے۔
محترمہ واڈرا نے کہا کہ ریاست کے وزیر اعلیٰ وی ڈی ستیشن خود راحت کے کام کی نگرانی کر رہے ہیں۔ پولیس، نیشنل ڈیزاسٹر ریسپانس فورس (این ڈی آر ایف)، (ایس ڈی آر ایف) کی ٹیمیں اور سول ڈیفنس کے رضاکار موقع پر راحت اور بچاؤ کے کام میں جٹے ہوئے ہیں۔ انہوں نے بتایا کہ ضلع انتظامیہ، ریاستی حکومت کے وزراء اور مقامی کانگریس عہدیداران، متعلقہ ایجنسیوں کے ساتھ مسلسل تال میل قائم کر کے راحت کے کام کو آگے بڑھا رہے ہیں۔ محترمہ واڈرا نے اس حادثے میں اپنے پیاروں کو کھونے والے خاندانوں کے ساتھ گہری تعزیت کا اظہار کرتے ہوئے کہا کہ اس مشکل وقت میں کانگریس ان کے ساتھ پوری مضبوطی سے کھڑی ہے اور ہر ممکن مدد فراہم کی جائے گی۔ انہوں نے ابھی بھی لاپتہ لوگوں کے محفوظ ملنے کی دعا کرتے ہوئے ان کے اہل خانہ سے صبر اور ہمت قائم رکھنے کی اپیل کی۔
انہوں نے یونائیٹڈ ڈیموکریٹک فرنٹ (یو ڈی ایف) کے کارکنوں، عہدیداروں اور عام شہریوں سے اپیل کی کہ وہ انتظامیہ کی ہدایات پر عمل کرتے ہوئے راحت اور بچاؤ کے کام میں ہر ممکن تعاون کریں۔ انہوں نے کہا کہ اس مشکل وقت میں یہ یقینی بنانا ضروری ہے کہ راحت اور بچاؤ مہم میں کسی قسم کی رکاوٹ نہ آئے اور تمام لوگ بغیر کسی خلل کے متاثرین تک امداد پہنچانے میں تعاون کریں۔ قابل ذکر ہے کہ وائناڈ میں بھاری بارش کے بعد سرنگ کی تعمیر کے مقام کے قریب لینڈ سلائیڈنگ ہوئی۔ جس میں کئی مزدوروں اور سیاحوں کے ملبے میں پھنسے ہونے کا خدشہ ظاہر کیا جا رہا ہے۔