سری نگر/۳جولائی
پیپلز ڈیموکریٹک پارٹی (پی ڈی پی) کی صدر اور جموں و کشمیر کی سابق وزیر اعلیٰ محبوبہ مفتی نے جمعہ کو تہران کے دورے کے دوران ایران کے سپریم لیڈر آیت اللہ سید علی خامنہ ای کو خراجِ عقیدت پیش کرتے ہوئے کہا کہ انہیں ذاتی طور پر تعزیت اور یکجہتی کا اظہار کرنے کے لیے تہران آنا اپنے لیے ایک اعزاز محسوس ہو رہا ہے۔
محبوبہ نے سوشل میڈیا پلیٹ فارم ایکس پر ایک پوسٹ میں لکھا’’میرے لیے یہ اعزاز کی بات ہے کہ میں تہران میں موجود ہوں تاکہ ایران کے سپریم لیڈر آیت اللہ سید علی خامنہ ای کی شہادت پر اپنے گہرے رنج و غم اور یکجہتی کا اظہار کر سکوں۔ وہ ایک ایسی باوقار شخصیت تھے جنہوں نے حالات کے دھارے کے خلاف ڈٹ کر کھڑے ہونے کا حوصلہ دکھایا اور مظلوموں کے حقوق کے لیے جدوجہد کی‘‘۔
پی ڈی پی صدر نے یہ ریمارکس اپنے دورۂ ایران کے دوران ادا کیے، جہاں انہوں نے دیگر معزز شخصیات اور سوگواران کے ہمراہ تعزیتی تقریبات میں شرکت کی۔
موصوفہ نے آیت اللہ خامنہ ای کو ایک ایسے رہنما کے طور پر خراجِ تحسین پیش کیا جو عالمی ناانصافیوں کے خلاف مضبوطی سے کھڑے رہے اور ہمیشہ مظلوموں کے حق میں آواز بلند کرتے رہے۔
