ڈی آئی پی آر
سرینگر؍۳ جولائی
لیفٹیننٹ گورنر منوج سنہا سے آج مختلف وفود نے ملاقات کی اور مرکز کے زیر انتظام جموں و کشمیر میں سنسکرت زبان کے فروغ، ہاؤس بوٹ صنعت کو درپیش مسائل اور منشیات کے خلاف جاری مہم سمیت مختلف اہم امور پر تبادلۂ خیال کیا۔
شری کیلاش جیوتش اینڈ ویدک سنستھان ٹرسٹ کے صدر مہنت روہت شاستری نے لیفٹیننٹ گورنر سے ملاقات کے دوران جموں و کشمیر میں سنسکرت زبان اور ویدک تعلیم کے تحفظ اور فروغ سے متعلق مختلف معاملات پر گفتگو کی۔
انہوں نے شری ماتا ویشنو دیوی یونیورسٹی، کٹرا میں سنسکرت فیکلٹی کے عہدوں کی منظوری پر لیفٹیننٹ گورنر کا شکریہ بھی ادا کیا۔
ادھر آل کشمیر ہاؤس بوٹ اونرز ایسوسی ایشن کے چیئرمین منظور پختون کی قیادت میں ایک وفد نے بھی لیفٹیننٹ گورنر سے ملاقات کی۔
وفد نے دریائے جہلم پر چلنے والے ہاؤس بوٹ مالکان کی فلاح و بہبود، کشمیر کے ہاؤس بوٹس کو ورثہ اثاثہ قرار دینے اور سری نگر ریلوے اسٹیشن پر ہاؤس بوٹس کے لیے معلومات اور بکنگ کاؤنٹر قائم کرنے سمیت متعدد اہم مطالبات پیش کیے۔
دریں اثنا، گاندھی گلوبل فیملی کشمیر کے جموں و کشمیر صدر پدم شری ڈاکٹر ایس پی ورما کی قیادت میں ایک وفد نے بھی لیفٹیننٹ گورنر سے ملاقات کی اور نشہ مکت جموں و کشمیر ابھیان کے ذریعے منشیات کے استعمال کی روک تھام میں حاصل ہونے والی کامیابیوں کو سراہا۔
لیفٹیننٹ گورنر نے تنظیم کی سماجی خدمات کی تعریف کرتے ہوئے اس کے ارکان پر زور دیا کہ وہ امن، فرقہ وارانہ ہم آہنگی، ماحولیاتی تحفظ، نوجوانوں اور خواتین کو بااختیار بنانے کے لیے اپنی کوششیں اسی جذبے کے ساتھ جاری رکھیں۔
