ایویان جاتے ہوئے مودی جنیوا میں رکے، سوئٹزرلینڈ کے صدر سے ملاقات

نئی دہلی، 16 جون (یواین آئی) وزیرِ اعظم نریندر مودی سلواکیہ کا دورہ مکمل کرنے کے بعد جی-7 سربراہی اجلاس میں شرکت کے لیے منگل کو فرانس کے شہر ایویان روانہ ہوئے۔ اس دوران وہ کچھ دیر کے لیے سوئٹزرلینڈ کے شہر جنیوا میں رکے، جہاں ہوائی اڈے پر ان کی سوئٹزرلینڈ کے صدر گائے پارمیلین سے ملاقات ہوئی۔
مودی نے اس ملاقات کی اطلاع سوشل میڈیا پر ایک پوسٹ کے ذریعے دیتے ہوئے کہاکہ”کچھ دیر قبل جنیوا پہنچا ہوں، جہاں سے جی-7 سربراہی اجلاس میں شرکت کے لیے ایویان جاؤں گا۔ ہوائی اڈے پر سوئٹزرلینڈ کے صدر مسٹر گائے پارمیلین سے ملاقات ہوئی۔ ان کے ساتھ بہت اچھی گفتگو رہی۔”
اس سے قبل وزارتِ خارجہ کے ترجمان نے بھی سوشل میڈیا پر بتایا تھا کہ مودی جی-7 سربراہی اجلاس میں شرکت کے لیے ایویان جاتے ہوئے جنیوا میں رکے، جہاں سوئٹزرلینڈ کے صدر گائے پارمیلین نے ان کا استقبال کیا۔
دونوں رہنماؤں نے ایک دوسرے کا پرتپاک خیرمقدم کیا اور ہندوستان-سوئٹزرلینڈ شراکت داری کو مزید مضبوط بنانے کے اپنے عزم کا اعادہ کیا۔
وزیرِ اعظم نریندر مودی جی-7 ممالک کے سربراہی اجلاس میں شرکت کے لیے منگل کو سلواکیہ سے فرانس کے شہر ایویان پہنچ گئے۔ اس دوران وہ کچھ دیر کے لیے سوئٹزرلینڈ میں بھی رکے جہاں انہوں نے صدر گائے پارمیلین سے ملاقات کی۔
ملاقات کے بعد وہ ایویان روانہ ہو گئے۔ ایویان پہنچنے پر انہوں نے کہا کہ وہ اہم عالمی مسائل پر دنیا کے سرکردہ رہنماؤں کے ساتھ بات چیت کے منتظر ہیں۔
مودی نے سوشل میڈیا پر ایک پوسٹ میں کہاکہ”جی-7 سربراہی اجلاس کے لیے فرانس کے ایویان پہنچ گیا ہوں۔ عالمی رہنماؤں کے ساتھ ملاقات اور اہم بین الاقوامی امور پر تبادلۂ خیال کا بے صبری سے انتظار ہے۔ ہندوستان ایک زیادہ پائیدار اور خوشحال دنیا کے لیے مشترکہ کوششوں کو آگے بڑھانے کے لیے پُرعزم ہے۔”
قابلِ ذکر ہے کہ ہندوستان جی-7 سربراہی اجلاس میں ایک شراکت دار ملک کے طور پر شرکت کر رہا ہے۔ اجلاس کے موقع پر وزیرِ اعظم کی مختلف ممالک کے رہنماؤں کے ساتھ دوطرفہ ملاقاتوں کا بھی پروگرام ہے۔ ان کی امریکی صدر ڈونلڈ ٹرمپ سے ملاقات کا بھی امکان ظاہر کیا جا رہا ہے۔