گجرات سے عمان اور دیگر خلیجی ممالک کو جوڑنے والی توانائی پائپ لائن سے متعلق خبریں جھوٹی ہیں: حکومت

نئی دہلی، 16 جون (یواین آئی) وزارتِ پیٹرولیم و قدرتی گیس نے ان میڈیا رپورٹس کو غلط قرار دیا ہے جن میں دعویٰ کیا گیا تھا کہ ہندوستان گہرے سمندر میں گجرات کو عمان اور دیگر خلیجی ممالک سے جوڑنے والی ایک توانائی پائپ لائن تعمیر کر رہا ہے وزارت نے منگل کو جاری ایک بیان میں کہا کہ اس نے ان میڈیا رپورٹس کا نوٹس لیا ہے جن میں کہا گیا ہے کہ حکومتِ ہند سرگرمی کے ساتھ ایک گہرے سمندر کی توانائی پائپ لائن تعمیر کر رہی ہے، جسے ’’مغربی ایشیا-ہندوستان ڈیپ واٹر پائپ لائن‘‘ (ایم ای آئی ڈی پی) کا نام دیا جا رہا ہے۔ بتایا گیا تھا کہ یہ پائپ لائن گجرات کو عمان اور دیگر خلیجی ممالک سے جوڑے گی۔
وزارت نے واضح کیا ہے کہ اس نوعیت کی کوئی تجویز فی الحال وزارت کے زیرِ غور نہیں ہے۔ اس منصوبے کے حوالے سے وزارت کی کسی بھی سطح پر عمان یا کسی دوسرے خلیجی ملک کے ساتھ کوئی فعال بات چیت یا مذاکرات جاری نہیں ہیں۔
وزارت نے کہا کہ اس معاملے سے متعلق تمام قیاس آرائیوں کا خاتمہ کرنے کے لیے یہ وضاحت جاری کی گئی ہے۔
قابلِ ذکر ہے کہ بعض میڈیا رپورٹس میں دعویٰ کیا گیا تھا کہ مغربی ایشیا کے بحران کے باعث توانائی کی سپلائی متاثر ہونے کے خدشے کے پیشِ نظر ہندوستان نے یہ پائپ لائن تعمیر کرنے کا فیصلہ کیا ہے۔