ایجنسیز
جموں؍۱۷جون
جموں میں قائم وائٹ نائٹ کور کے جنرل آفیسر کمانڈنگ (جی او سی) لیفٹیننٹ جنرل پی کے مشرا نے بدھ کے روز راجوری ضلع کے نوشہرہ سیکٹر میں لائن آف کنٹرول (ایل او سی) کے ساتھ واقع اگلے مورچوں کا دورہ کیا اور وہاں سکیورٹی کی موجودہ صورتحال اور تعینات فوجی دستوں کی جنگی تیاریوں کا جائزہ لیا۔
فوج کی جانب سے جاری بیان کے مطابق وائٹ نائٹ کور کے کمانڈر کے ہمراہ ’’ایس آف اسپیڈز ڈویژن‘‘ کے جنرل آفیسر کمانڈنگ میجر جنرل کوشک مکھرجی بھی موجود تھے۔
بیان میں کہا گیا کہ کور کمانڈر نے اگلے مورچوں پر تعینات جوانوں سے ملاقات کی اور ملکی سرحدوں کے تحفظ کے لیے ان کی ثابت قدمی، بلند حوصلے اور مسلسل چوکسی کو سراہا۔
وائٹ نائٹ کور نے سوشل میڈیا پلیٹ فارم ’’ایکس‘‘ پر ایک پوسٹ میں کہا کہ ’’جی او سی وائٹ نائٹ کور نے جی او سی ایس آف اسپیڈز ڈویژن کے ہمراہ نوشہرہ سیکٹر کے اگلے علاقوں کا دورہ کیا تاکہ موجودہ سکیورٹی ماحول کا جائزہ لیا جا سکے اور ایل او سی پر تعینات فوجیوں کی جنگی صلاحیتوں کا معائنہ کیا جا سکے۔‘‘
دورے کے دوران لیفٹیننٹ جنرل مشرا کو فوجی تعیناتیوں، نگرانی کے انتظامات اور سیکٹر میں آپریشنل صلاحیتوں کو مزید مضبوط بنانے کے لیے جاری اقدامات کے بارے میں تفصیلی بریفنگ دی گئی۔
فوج کے مطابق کور کمانڈر نے اگلے مورچوں پر تعینات جوانوں کے ساتھ بات چیت کرتے ہوئے ان کے عزم، بلند حوصلے اور ملکی سرحدوں کے دفاع کے لیے غیر متزلزل چوکسی کی تعریف کی۔
(ایجنسیاں)
