جموں و کشمیر کے لیے ریلوے خدمات میں توسیع کا مطالبہ
نئی دہلی؍۱۰جون
وزیر اعلیٰ عمر عبداللہ نے آج نئی دہلی میں مرکزی وزیر ریلوے اشونی ویشنو سے ملاقات کی اور جموں و کشمیر میں ریلوے خدمات کو مزید بہتر بنانے سے متعلق مختلف امور پر تبادلہ خیال کیا۔
ملاقات کے دوران وزیر اعلیٰ نے جموں-سری نگر وندے بھارت ایکسپریس کی معیاری خدمات، مسافروں کی سہولت اور وقت کی پابندی کو سراہتے ہوئے کہا کہ اس ٹرین نے وادی کشمیر اور ملک کے دیگر حصوں کے درمیان رابطے کو مضبوط بنانے میں اہم کردار ادا کیا ہے۔
عمر عبداللہ نے جنوبی کشمیر کے عوام کی سہولت کے پیش نظر وزیر ریلوے سے مطالبہ کیا کہ وندے بھارت ایکسپریس کا ایک اسٹاپ اننت ناگ میں بھی فراہم کیا جائے تاکہ جنوبی کشمیر اور ملحقہ علاقوں کے لوگوں کو بہتر سفری سہولیات میسر آسکیں۔
وزیر اعلیٰ نے وزیر ریلوے کو یہ بھی بتایا کہ سری نگر بین الاقوامی ہوائی اڈہ یکم اکتوبر سے۱۵؍ اکتوبر۲۰۲۶ تک رن وے کی مرمت اور ازسرِ نو سطح بندی کے کام کے باعث بند رہے گا۔
عمرعبداللہ نے کہا کہ یہ مدت وادی میں سیاحتی سیزن کے عروج کا وقت ہوتی ہے، جس کے باعث سیاحوں، یاتریوں اور مقامی باشندوں کی آمد و رفت متاثر ہو سکتی ہے۔
اس تناظر میں عمر عبداللہ نے ریلوے وزارت سے درخواست کی کہ ہوائی اڈے کی بندش کے دوران وندے بھارت ٹرینوں کی تعداد اور دیگر ریلوے خدمات میں اضافہ کیا جائے تاکہ فضائی سفر کا مؤثر متبادل فراہم کیا جا سکے اور سیاحت و معاشی سرگرمیوں کو متاثر ہونے سے بچایا جا سکے۔
عمرعبداللہ نے کہا کہ بہتر ریلوے رابطہ نہ صرف سیاحوں بلکہ درگا پوجا تعطیلات کے دوران آنے والے زائرین اور مقامی مسافروں کے لیے بھی فائدہ مند ثابت ہوگا۔
قابلِ ذکر ہے کہ۳۰؍ اپریل۲۰۲۶کو مرکزی وزیر ریلوے اشونی ویشنو نے وزیر اعلیٰ عمر عبداللہ اور دیگر معززین کے ہمراہ شری ماتا ویشنو دیوی کٹرا اور سری نگر کے درمیان وندے بھارت ایکسپریس کا افتتاح کیا تھا، جس کے ذریعے پہلی مرتبہ جموں اور کشمیر وادی کے درمیان براہِ راست ریلوے رابطہ قائم ہوا۔
